ომისა და სისხლისღვრის კატეგორიული წინააღმდეგი ვარ, ყველა დაღუპულ სომეხსა და აზერბაიჯანელზე გული შემტკივა - სააკაშვილი მის მიერ გაკეთებულ განცხადებას განმარტავს

პოლიტიკა - 14:38, 05 Oct, 2020

968

საქართველოს მესამე პრეზიდენტი მიხეილ სააკაშვილი რამდენიმე დღის წინ გამართულ აქციას ეხმაურება, რომელსაც ეთნიკურად სომხური წარმოშობის საქართველოს მოქალაქეები მართავდნენ და მის პოზიციას აპროტესტებდნენ, რომელიც სააკაშვილმა ვიდეო მიმართვაში დააფიქსირა.„ჩემი პოზიცია სომხეთ-აზერბაიჯანის კონფლიქტზე ყველას ძალიან კარგად ესმის. მე ვარ ომისა და სისხლისღვრის კატეგორიული მოწინააღმდეგე. მე ყველა დაღუპულ სომეხსა და აზერბაიჯანელზე გული შემტკივა. შეუძლებელია მომწონდეს, როცა საბრძოლო მოქმედებები მიმდინარეობს. ამავე დროს, მე ვარ საქართველოს შვილი და ასევე, უკრაინის მოქალაქე. შეუძლებელია ქართველი და ნებისმიერი უკრაინელი არ უჭერდეს მხარს ქვეყნის ტერიტორიული მთლიანობის პრინციპს და მხარს უჭერდეს სეპარატიზმს. უფრო მეტიც, ნებისმიერი ქართველი, რა ეთნიკური წარმომავლობისაც არ უნდა იყოს, ვინც სეპარატიზმს მხარს უჭერს, ის საქართველოს წინააღმდეგია. ამიტომ, როდესაც ჩვენ ტერიტორიული მთლიანობის პრინციპს ვაღიარებთ, როგორც უკრაინის მთავრობამაც განაცხადა და მეც არაერთხელ მითქვამს წარსულში, ჩვენ ვაღიარებთ აზერბაიჯანის ტერიტიორიულ მთლიანობასაც“, - განაცხადა სააკაშვილმა.

შეგახსენებთ, რომ რამდენიმე დღის წინ გავრცელებულ ვიდეო მიმართვაში საქართველოს მესამე პრეზიდენტმა აღნიშნა, მთიანი ყარაბაღი აზერბაიჯანის ტერიტორიაა. სწორედ ამ განცხადებას მოჰყვა სომხებისგან მწვავე რეაქცია და მათ „მთავარი არხის“ წინ აქცია გამართეს, სადაც სააკაშვილის პოზიცია გააპროტესტეს.