მცირე ბიზნესებისა და კერძო ინიციატივების ხელშეწყობა უნდა იყოს პრიორიტეტული მიმართულება

მცირე ბიზნესებისა და კერძო ინიციატივების ხელშეწყობა უნდა იყოს პრიორიტეტული მიმართულება - გიგი უგულავა

პოლიტიკა - 13:18, 05 Oct, 2020

641

ევროპული საქართველოს მაჟორიტარობის კანდიდატი ზუგდიდში, გიგი უგულავა, ზუგდიდის რაიონის სოფელ ნარაზენში, მოცვის პლანტაციებს ესტუმრა.

გიგი უგულავას თქმით, სახელმწიფომ ხელი უნდა შეუწყოს ახალი აგროპროდუქტების გაშენებას და კერძო ინიციატივებს, რათა მოსახლეობა დასაქმდეს და ამოვიდეს სოციალური და ეკონომიკური კრიზისიდან. გიგი უგულავამ აღნიშნა, რომ სწორედ ევროპული საქართველოს გეგმა, რომ სახელმწიფო ქონებაში არსებული მიწები გადაეცეთ ხალხს, წაახალისებს ამგვარ ინიციატივებს და მოუტანს ქვეყანას გარდამტეხ ცვლილებებს.

„სოფელ ნარაზენში, სადაც ადრე, კომუნისტების დროს, ძირითადად, ჩაის კულტურა მოდიოდა, ყველაზე პოპულაური ახალი აგროპროდუქტი არის მოცვი. სულ რაღაც 10-15 წელია, რაც აქტიურად დაიწყო ამ კულტურის დანერგვა ზუგდიდში, ის ყველაზე რენტაბელურია და ამიტომაც ძალიან პერსპექტიულია.

სრულფასოვანი დამუშავების შემდეგ, მე-7 წელს უკვე, სუფთა მოგება 1 ჰექტარზე შეიძლება დარცეს 100 000 ლარი, რადგან კილოს ფასი საკმაოდ მაღალია.

ეს არის ის პრიორიტეტული მიმართულება, რომელსაც ჩვენ აქტიურად უნდა შევუწყოთ ხელი, დავეხმაროთ კერძო ინიციატივებს. მახსოვს, როდესაც პირველად დავიწყეთ მოცვზე საუბარი, იყო სკეპტიკურად განწყობილი ადამიანები, იუმორისტული ჟანრის შეძახილები, თუმცა ფაქტია, რომ ვხედავთ გაშენებულ ფერდობებს, ველოდებით პირველ მოსავალს, რითაც ადამიანებს შვება მიეცემათ. ეს არის სწორი მიდგომა, უნდა ვიყოთ გაბედულები, რადგან გამბედაობას და ცოდნას ერთობლიობაში მოაქვს განვითარება.“ - განაცხადა გიგი უგულავამ .