„არიფ იუსუპოვის დაკავების მიზეზი ისაა, რომ იგი "ნაციონალური მოძრაობის" მხარდამჭერია. ჩვენ არ გვინდა შიშში ცხოვრება. ვითხოვთ იუსუპოვის გათავისუფლებას“ - აცხადებს აქციის ერთ-ერთი მონაწილე.

საპროტესტო აქციაზე იმყოფებოდნენ ოპოზიციის წევრებიც. მათი განცხადებით ხელისუფლება ტოტალურ ძალადობაზეა გადასული, რადგან წინასწარ აცნობიერებს, რომ არჩევნებს წააგებს, თუმცა ეს ძალადობრივი ქმედებები მას მხარდამჭერთა რაოდენობას მნიშვნელოვნად შეამცირებს.

„იუსუპოვის დაკავება ხელისუფლების თავგასულობაზე მიუთითებს. ადამიანი არის დაზარალებული, ჩხუბში ნაცემი და მას იჭერენ. კიდევ რამდენიმე კვირა უნდა გავუძლოთ "ოცნების" მმართველობას და ისინი აღარ იქნებიან ხელისუფლებაში“ - განაცხადა "ძალა ერთობაშიას" მაჟორიტარმა დავით კირკიტაძემ.

შეგახსენებთ, რომ 3 ოქტომბერს პოლიცია იუსუპოვის სახლთან მივიდა და მის დაკავებას შეეცადა. აქტივისტს "ოცნების" მხარდამჭერებზე მომხდარ ძალადობაში ადანაშაულებდნენ, თუმცა მეზობლებისა და იუსუპოვის ოჯახის წევრების წინააღმდეგობის გამო მისი დაკავება ვერ მოახერხეს.

მოგვიანებით, არიფ იუსუპოვი ბოლნისის პოლიციას თავად ჩაბარდა. მანამდე, 27 სექტებერს, ის სასტიკად სცემეს „ქართული ოცნების“ ბოლნისის, დმანისის, თეთრიწყაროსა და წალკის მაჟორიტარი დეპუტატობის კანდიდატის გოგი მეშველიანის აქტივისტებმა.