მან კახეთში 50-ზე მეტ მეწარმესა და ბიზნესმენს უმასპინძლა. გარდა ამისა, სუფრა გაიშალა ასევე კაბალშიც, სადაც ხელისუფლების კანდიდატი ბაგა-ბაღების პედაგოგებსა და ადგილობრივ ამომრჩეველს მასპინძლობდა. თავად ქადაგიშვილი აცხადებს, რომ აღნიშნულ სუფრაზე თავად მოსახლეობამ დაპატიჟა და მდიდრული სუფრის ნაცვლად მაგიდაზე მხოლოდ ჩაი, წყალი და კანფეტი იყო.

"შეხვედრის შემდეგ სექტორს თვითონ აქვს სურვილი, რომ მცირედი მიღება გამართონ და რა თქმა უნდა, ჩვენ თანახმა ვართ, ამ მიღებაში მივიღოთ მონაწილეობა. სუფრას რა ვიცი რას ეძახით, როდესაც ჩაის მოგართმევენ, წყალს მოგართმევენ და კანფეტს მოგართმევენ, თუ გინდათ სუფრა დაარქვით და თუ გინდათ ბანკეტი", - თქვა ქადაგიშვილმა.

აქვე უნდა აღინიშნოს, რომ კორონავირუსის გამო ქვეყანაში მოქმედებს შეზღუდვები, რომლის ფარგლებშიც დახურულ სივრცეში 10 -ზე მეტი პირის ერთ მაგიდაზე შეკრება იკრძალება.