„ორმხრივი ხელშეკრულება, რომლის ფარგლებში უმოკლეს ვადებში ხელი მოეწერება ოქმებს, წარმოადგენს მნიშვნელოვან წინ გადადგმულ ნაბიჯს, როგორც ქვეყნებს შორის ურთიერთობების გაღრმავების, ასევე, საქართველოს მოქალაქეთა კვალიფიკაციის ამაღლების კუთხით.

საგულისხმოა, რომ აღნიშნულ საკითხზე, კონსულტაციები, მხარეებს შორის დიდი ხანია მიმდინარეობს და საელჩოს მიერ გაწეული დაუღალავი შრომის შედეგად ახლა დასრულდა“ - ნათქვამია განცხადებაში.

აღსანიშნავია, რომ განცხადებას, რომელიც ჟვანიამ გაავრცელა, ებრაული სახელმწიფო არ გამოხმაურებია. ემიგრანტებში გაჩნდა ვარაუდი, რომ ეს შეთანხმება ცალმხრივია, რადგან ისრაელის საგარეო საქმეთა სამინისტრო შეთანხმების შესახებ ოფიციალურ განცხადებას არ აკეთებს.

ნიუპოსტი საქართველოს საგარეო საქმეთა სამინისტროსაც დაუკავშირდა, რათა ოფიციალურად დაედასტურებინათ აღნიშნული ინფორმაცია. უწყებაში დაადასტურეს გუშინდელი შეთანხმება და განგვიმარტეს, რომ საქართველოს საელჩოს მიერ გავრცელებული ინფორმაცია სრული სიზუსტით სიმართლეს შეესაბამება.

აქვე უნდა ითქვას, რომ ისრაელის საელჩო საქართველოში ასევე ავრცელებს განცხადებას, რომელიც დადებულ ხელშეკრულებას ადასტურებს:

„ისრაელის საელჩო საქართველოში მოხარულია გაცნობოთ ახალშექმნილი „ისრაელ-საქართველოს სავაჭრო პალატის“ ვებგვერდის ამოქმედების შესახებ. ორივე ქვეყნის ბიზნეს წრეებსა და ინვესტორებს ახლა პირველად ექნებათ საშუალება მიიღონ პროფესიული, ზუსტი და სანდო ინფორმაცია 3 ენაზე (ივრითი, ქართული და ინგლისური). ისრაელის საელჩოს ვებგვერდსა და ფეისბუქ გვერდთან ერთად, IGCC-ის ახალი ვებგვერდი დაინტერესებულებს მიაწოდებს ექსპერტთა რჩევებს, სასარგებლო ინფორმაციას და მისცემს ქსელური კონტაქტების შესაძლებლობას, რითიც წვლილს შეიტანს ქვეყნების ორმხრივი სავაჭრო და ეკონომიკური ურთიერთობების განვითარებაში“ - ნათქვამია განცხადებაში.

საყურადღებოა კიდევ ერთი გარემოება - ისრაელში რუსულენოვანმა საიტმა გაავრცელა ინფორმაცია, რომ აღნიშნული ხელშეკრულება ფარსია და მხოლოდ ფორმალური დატვირთვა აქვს:

„ისრაელისა და საქართველოს საგარეო საქმეთა სამინისტროებმა ხელი მოაწერეს ხელშეკრულებას, რომელიც ითვალისწინებს საქართველოს მოქალაქეების დროებით დასაქმებას "ისრაელის სახელმწიფოში შრომის ბაზრის გარკვეულ სექტორებში".

ამის შესახებ ფეისბუქზე განაცხადა ებრაულ სახელმწიფოში საქართველოს ელჩმა ლაშა ჟვანიამ. მან აღნიშნა, რომ ახლა ქართველებს არ მოუწევთ "ისრაელში მუშაობის უკანონო მარშრუტების ძებნა" და არც "დიდი ფულის გადახდა მოუწევთ სამუშაოს მისაღებად".

რომელ კონკრეტულ სფეროებში შეეძლებათ საქართველოს მოქალაქეებს ისრაელში მუშაობა და იქნება თუ არა რაოდენობრივი კვოტები, ელჩმა არ თქვა. როგორც ჩანს, შეთანხმება კვლავ ჩარჩო ხელშეკრულებაა, რომელიც არ ითვალისწინებს კონკრეტულ დეტალებს.

ისრაელის საგარეო საქმეთა სამინისტრომ არ გააკეთა ოფიციალური განცხადებები საქართველოსთან გაფორმებულ ხელშეკრულებასთან დაკავშირებით, ამიტომ ის არ გაშუქებულა ისრაელის პრესაში“ - ვკითხულობთ სტატიაში.

„ამ ბუნდოვანი და გაურკვეველი ხელშეკრულების დადების შემდეგ, რომელშიც ბევრი დეტალი არაა განსაზღვრული და ასევე არაა ჩამოყალიბებული გარკვეული საკითხები, ჩნდება კითხვა - დადო კი რეალურად საქართველომ და ისრაელმა ის ხელშეკრეულება, რომელიც ჩვენს მოქალაქეებს სრულფასოვან დასაქმებაში დაეხმარება? თუ ეს ნაბიჯი მხოლოდ და მხოლოდ წინასაარჩევნოდ გადმოგდებული სატყუარაა, რომელიც გადამწყვეტ არჩევნებამდე ცოტა ხნით ადრე გააჟღერეს, რადგან, როგორც სჩვევიათ, „გემრიელ ლუკმას“ ბოლოსკენ ინახავენ, რათა ხალხის კეთილგანწყობა დაიმსახურონ. მგონია, რომ ეს არის ფარსი და წინასაარჩევნო პროპაგანდა“ - აცახებს ნიუპოსტთან ერთ-ერთი ემიგრანტი, რომელიც დადებული ხელშეკრულების გასაჯაროებასა და დეტალების გაცნობას ითხოვს.

ავტ: ლილე შუკვანი