„პირველი არხის“ ჟურნალისტის რუსუდან ლოლაძის განცხადებით, დაშავებულია მისი ოპერატორიც, რომელსაც თავს ორი ადამიანი დაესხა. როგორც ლოლაძე აღნიშნავს, დაზიანებულია მათი კუთვნილი ტექნიკაც:

„ორი მაღალი, ახალგაზრდა ბიჭი დაეტაკა, ერთმა კამერა გამოგლიჯა ხელიდან მეორემ კი ფიზიკური შეურაცხყოფა მიაყენა. სერიოზული დაზიანება ჩემ ოპერატორს ესე გარეგნულად არ აქვს, თუმცა ერთი-ორჯერ მუშტი მოხვდა. კამერის ნაწილები ვიპოვეთ მიმდებარე ტერიტორიაზე მიმოფანტული. ეს კამერა რამდენიმე წუთის წინ დაილუქა, საბედნიეროდ იქ არის ჩიპი, მოძალადებმა ვერ მაოხერხეს ჩიპის ამოღება. იმედი გვაქვს, რომ ამ მასალაზე ჩანს იმ ადამიანების სახე და კადრები თუ ვინც იძალადა ოპერატორზე“ - განაცხადა რუსუდან ლოლაძემ.

გუშინდელ ფიზიკურ დაპირისპირებაში დაშავდა ასევე „მთავარი არხის“ ოთხ თანამშრომელს. როგორც ისინი აცხადებენ, პოლიციამ ვითარების განმუხტვისთვის არანაირ ზომას არ მიმართა:

"ქართული ოცნების" მხარდამჭერებისა და შტაბის წევრების მხრიდან მოხდა "მთავარი არხის" ჟურნალისტებზე და ჯგუფზე თავდასხმა. პოლიციამ, რომელმაც არაფერი არ მოიმოქმედა არანაირი ზომა არ მიიღო. მე თვითონ მივმართე პოლიციას, რომ დაეწყოთ გამოძიება ამ ფაქტზე წარვუდგინე ჩემი მობილური ტელეფონით გადაღებული კადრები, იქ არის კამერები კიდევ, რაც ვიცი, რაზეც მაქვს ინფორმაცია“ - აღნიშნა „მთავარი არხის“ ჟურნალისტმა ბაჩო ტურაშვილმა.

ამავე არხის ადგილობრივ კორესპონდენტს გატეხილი აქვს თავი და ის საავადმყოფოშია გადაყვანილი. დაზიანებულია მათი კუთვნილი ტექნიკა

"მთავარი არხის" ჟურნალისტისა და ოპერატორების ადვოკატის განცხადებით, გამოძიება რამდენიმე მუხლით არის დაწყებული, მათ შორის ჟურნალისტური საქმიანობისათვის ხელშეშლისა და ძალადობის ფაქტზე.

შეგახსენებთ, რომ გუშინ, მარნეულში "მთავარი არხისა" და საზოგადოებრივი მაუწყებლის ჟურნალისტებსა და ოპერატორებს თავს დაესხნენ, დაკავებული კი ამ დრომდე არავინაა.

მანამდე მარნეულში საღამოს მომხდარი დაპირისპირებისას ენმ-ს საოლქო კომისიის წევრი, ლაშა ქველაძე და მასთან ერთად მყოფი პირები დაშავდნენ. ქველაძე სასწრაფო დახმარებამ საავადმყოფოში გადიაყვნა. დამტვრეულია მისი მანქანაც.

ადგილზე ფიზიკურად გაუსწორდნენ სადამკვირვებლო ორგანიზაციის წარმომადგენელ გიორგი მუმლაძესაც. მუმლაძე ამბობს, რომ საკრებულოს თავმჯდომარე, რომელიც მისივე თქმით, უშუალოდ ხელმძღვანელობდა თავდასხმას, ხელს უშლიდა აქტივისტს დაერეკა სასწრაფოში, როდესაც დაპირისპირება დაიწყო.