დაკითხვების სერია პოლიციაში, ამორტიზირებული ლიფტები თბილისში და ახალი ნივთმტკიცებები საქმეში - რა ვითარებაში ჩავარდა 6 წლის ბიჭი შახტაში

საზოგადოება - 18:22, 03 Jul, 2020

1034

ვინ არის პასუხისმგებელი გლდანში, ლიფტის შახტაში 6 წლის ბავშვის ჩავარდნის საქმეზე - პოლიციამ გუშინ მომხდარი ფაქტის ირგვლივ გამოძიება აქტიურად დაიწყო.

"ნიუპოსტის" ინფორმაციით, გლდანი-ნაძალადევის სამმართველოში დაკითხვაზე მიიყვანეს იმ ლიფტის ხელოსანი, რომელთანაც კორპუსის ამხანაგობას სამ წლიანი კონტრაქტი ჰქონდა გაფორმებული.

ჩვენი ინფორმაციით, ხელოსანმა პოლიციას უთხრა, რომ ლიფტს შემოწმება ერთი კვირის წინ ჩაუტარდა და არანაირი მნიშვნელოვანი შეფერხება არ ქონია.

რაც შეეხება დაშავებულს, მოზარდის მდგომარეობა სტაბილურად მძიმეა. 6 წლის ბიჭი, პედიატრიულ „პრივატ კლინიკაში" რეანინმაციულ განყიოფილებაშია მოთავსდებული.

არსებული ინფორმაციით, მოზარდს რამდენიმე ოპერაციის გაკეთება სჭირდება. ქირურგიული ჩარევის ზუსტი დრო კი უახლოეს საათებში, ჯანმრთელობის მდგომარეობის შესაბამისად გადაწყდება.

რაც შეეხება მომხდარის გარემოებებს, ამაზე საუბარი დაშავებულის ოჯახის წევრებს უჭირთ. ერთ-ერთი ვერსიით, 6 წლის ბავშვი ლიფტის შახტში მაშინ ჩავარდა, როდესაც ის ეზოდან სახლში ადიოდა, თუმცა რომელი სართულიდან მოხდა ვარდნა უცნობია. ვარაუდობენ, რომ არასრულწლოვანი მაოთხე სართულიდან ჩავარდა.

ცნობილია მხოლოდ ის, რომ დაშავებული დედ-მამამ იპოვა, შახტიდან ამოიყვანა და საკუთარი მანქანით მიიყვანა კლინიკაში.

გლდანში, შემთხვევის ადგილზე დღეს გამგებელიც მივიდა. მაღალჩინოსანი ირწმუნება, რომ ლიფტების პრობლემა ამხანაგობის პრეროგატივაა და გამგეობას არ ეხება:

"გლდანის რაიონის გამგეობის უფლებამოსილებაში არ შედის ლიფტების მონიტორინგი, ჩვენ ვპასუხობთ ამხანაგობის მიერ შემოსულ შეტყობინებებს"- განუცხადა მედიას ბექა მიქაუტაძემ.

შემთხვევა გლდანის მესამე ა მიკრორაიონში საღამოს საათებში მოხდა. ამ დროისათვის შემთხვევის ადგილი ყვითელი ლენტებით არის შემოსაზღვრული.

საგამოძიებო მოქმედებები ადგილზე სამი საათის განმავლობაში ტარდებოდა. როგორც "ნიუპოსტმა" გაარკვია, სამართალდამცველებმა ადგილზე ბავშვის სპორტული ფეხსაცმელი იპოვეს.

ადგილობრივები ამბობენ, რომ ლიფტები თითქმის ყველა სადარბაზოში ამორტიზებულია და მათ რეგულარულ შემოწმებას ითხოვენ.