დამამთავრებელი კლასის მოსწავლეების საბედისწერო წვეულება და გარდაცვლილი ფეხბურთელი - დაინტერესდება თუ არა გამოძიება 12 სკოლის მეთორმეტე კლასელებით

დამამთავრებელი კლასის მოსწავლეების საბედისწერო წვეულება და გარდაცვლილი ფეხბურთელი - დაინტერესდება თუ არა გამოძიება 12 სკოლის მეთორმეტე კლასელებით - რა მოხდა მცხეთაში

საზოგადოება - 10:50, 23 Jun, 2020

1575

19 წლის გარდაცვლილი ახალგაზრდა ფეხბურთელის საქმე - დაინტერესდება თუ არა გამოძიება 12 სკოლის მეთორმეტე კლასელებით - როგორც ირკვევა, 40 კაციან დაბადების დღის წვეულებაზე, უმრავლესობა სწორედ დამამთავრებელი კლასის მოსწავლეები იყვნენ.

ერთ-ერთი ვერსიით, დაპირისპირება 12-ე კლასელებსა და შედარებით უფროს ახალგაზრდებს შორის სუფრასთან დაიწყო და გზატკეცილზე გაგრძელდა.

არსებული ინფორმაციით, სწორედ მეთორმეტე კლასელებმა დაურეკეს თბილისში უფროს მეგობრებს და დახმარება სთხოვეს.

მეთორმეტე კლასელების თხოვნა ნახალოვკაში მცხოვრებლებმა გაითვალისწინეს და ინცინდენტში ჩაერთნენ.

გამოძიება ამ დრომდე კვლავ თავისუფლების უკანონოდ აღკვეთის მუხლით მიმდინარეობს, თუმცა შესაძლოა ის გადაკვალიფიცირდეს.

საგამოძიებო მოქმედებები მცხეთის პოლიციაში გუშინ გვიან ღამემდე მიმდინარეობდა. დაიკითხა კიდევ ორ მოწმე ისინი საგამოძიებო ექსპერიმენტის ჩასატარებლად შემთხვევის ადგილზე მიიყვანეს.

შაქარაშვილი 4 დღიანი სამძებრო სამუშაოების შემდეგ მდინარე არაგვში გარდაცვლილი გუშინ იპოვეს. მის კვალს მყვინთავებმა მცხეთის დასახლებულ პუნქტთან ახლოს, დაგუბებულ წყალში მიაკვლიეს. ფეხბურთელის ცხედარი სამაშველო ჯგუფებმა, მდინარე არაგვის ხიდიდან, დაახლოებით 2-3 კილომეტრში იპოვეს.

საქმეში ორი ავტომობილი ფიგურირებს, შავი ფერის, რომლის მარკაც უცნობია და ნაცრისფერი "მერსედესი".

ფიზიკური დაზიანებები აღენიშნება საქმის ოქროს მოწმეს გურამ ამირხანაშვილს, რომელმაც შაქარაშვილი ბოლოს ნახა.

მცხეთის პოლიციაში მიიყვანეს ვახო ახვლედიანი, რომელიც სისხლიან წვეულებას ესწრებოდა. "ნიუპოსტის" ინფორმაციით, მას ფიზიკური დაზიანება აღენიშნება.

ამ საქმეზე დაკითხული ერთ-ერთი პირის ადვოკატი, მზია ქასრაშვილიც ადასტურებს, რომ წვეულებაზე, სადაც მისი დაცვის ქვეშ მყოფი და გიორგი შაქარაშვილი იმყოფებოდნენ, ჩხუბი მოხდა, თუმცა იქვე დასძენს, რომ მისი დაცვის ქვეშ მყოფს არ ახსოვს გიორგი შაქარაშვილი ჩხუბში მონაწილეობდა თუ არა.

ჩვენთვის მოწოდებული ინფორმაციით, პოლიციამ ამ საქმეზე 3 არასრულწლოვანიც დაკითხა, თუმცა უცნობია რა უთხრეს მათ რეზონანსულ საქმეზე პოლიციელებს.

გიორგის ახლობლები და მეგობრები საქმის უსწრაფეს გამოძიებას და დამნაშავეების დასჯას ითხოვენ.