აუზები და ფიტნეს დარბაზები, შესაძლოა, ივლისის დასაწყისიდან გაიხსნან

საზოგადოება - 10:21, 23 Jun, 2020

675

ფიტნეს დარბაზები და აუზები, სავარაუდოდ, ივლისის დასაწყისიდან გაიხსნება.

სწორედ ამ ეტაპის დაწყებამდე რამდენიმე დღით ადრე ბიზნესომბუდსმენმა, ჯანდაცვის სამინისტროსა და ფიტნესინდუსტრიის წარმომადგენლებმა შეხვედრა გამართეს და კორონავირუსის გავრცელების პრევენციის მიზნით დარგისთვის შემუშავებული რეგულაციების სამუშაო ვერსია განიხილეს.

შეხვედრას 30-მდე ფიტნეს დარბაზის, ღია და დახურული აუზის წარმომადგენელი ესწრებოდა.

შეხვედრაზე კერძო სექტორის წარმომადგენლებმა შრომის პირობების ინსპექტირების დეპარტამენტის მიერ წარმოდგენილ რეგულაციებზე საკუთარი მოსაზრებები დააფიქსირეს და შეთანხმდნენ, რომ სამუშაო პროცესი გაგრძელდება.

„გრძელდება სამუშაო პროცესი სპორტული კომპლექსების წარმომადგენლებთან და გახსნის კონკრეტულ ვადებზე ამ ეტაპზე ვერ ვისაუბრებთ. რჩება შესათანხმებელი საკითხები სტანდარტებსა და რეგულაციებზე, რაც არის აუცილებელი წინაპირობა აღნიშნული სექტორის გასახსნელად. მას შემდეგ, რაც მოხდება შეთანხმება რეგულაციებზე, ჯანდაცვის სამინისტრო შეამოწმებს ობიექტებს და დავრწმუნდებით, რომ სპორტული კომპლექსები იცავენ ეპიდემიოლოგიურ მოთხოვნებს, უმოკლეს ვადებში მოხდება ამ სექტორის ამუშავება“ , – განაცხადა მიხეილ დაუშვილმა.

საქართველოს მთავრობის შეზღუდვების მოხსნის და ეკონომიკის ამოქმედების გეგმის მიხედვით სპორტულ-გამაჯანსაღებელი საქმიანობის გახსნა სწორედ მეექვსე ეტაპზეა დაგეგმილი.