იმ ადამიანებს, რომლებიც უცხო ქვეყნებიდან, განსაკუთრებით კი იტალიიდან შემოდიან საქართველოში, ახალი კორონავირუსით დაინფიცირების საფრთხის გათვალისწინებით, ეძლევათ რჩევა, რომ 14 დღის განმავლობაში თვითიზოლაციაში იყვნენ - შესაბამისი რეკომენდაცია საგანგებო ბრიფინგზე დაავადებათა კონტროლის ცენტრის ხელმძღვანელმა ამირან გამყრელიძემ გასცა.

ეს რეკომენდაცია საგულისხმოა იმ ადამიანებისთვის, რომლებსაც საზღვარზე სიმპტომები არ აღმოაჩნდათ. რაც შეეხებათ სიმპტომების მქონეებს, ისინი დაუყოვნებლივ უნდა გამოცხადდნენ კლინიკებში.

NCDC-ის ხელმძღვანელმა ასევე განაცხადა, რომ საბავშვო ბაღებში, სკოლებსა ამ ეტაპზე არ იძლევიან რეკომენდაციას სააღმზრდელო ან სასწავლო პროცესის შეწყვეტასთან დაკავშირებით: „ვიძლევით მხოლოდ რეკომენდაციას, მაქსიმალურად გავაინტენსიუროთ საზოგადოებრივი ჰიგიენის საკითხები ამ დაწესებულებებში“.