კონსტიტუციაში შესატან ცვლილებებზე გაიმართა მსჯელობა გუშინ გორში. საუბარია პარლამენტში წარდგენილ საკონსტიტუციო ცვლილებების ორ პროექტზე, რომელიც 2020 წლის არჩევნებისთვის პროპორციულ სისტემაზე გადასვლას გულისხმობს.

"ნიუპოსტის" კორექსპონდენტი ცნობით, განხილვაზე დასწრება სურდათ #სირცხვილია-ს წევრებს, თუმცა ისინი შენობაში არ შეუშვეს.

შეგახსენებთ, რომ მიუხედავად ოპოზიციის მრავალწლიანი მოთხოვნისა, მმართველმა პარტიამ და მისმა ლიდერმა ბიძინა ივანიშვილმა საპარლამენტო არჩევნების პროპორციულ სიტემაზე გადასვლის გადაწყვეტილება 20 ივნისის "გავრილოვის სისხლიანი ღამის" შემდეგ მიიღო, როცა ქართული ოცნება იძულებული გახდა, რუსთაველზე შეკრებილი მრავალათასიანი აქციის მონაწილეების სამი მოთხოვნიდან (გახარიას გადადგომა, პროპორციული საარჩევნო სისტემა და პოლიტპატიმრების გათავისუფლება) ეს მოთხოვნა გაეთვალისწინებინა.

როგორც ცნობილია, უმრავლესობის 93 დეპუტატის ხელმოწერით წარდგენილი კონსტიტუციურ კანონში ცვლილებები 2020 წლის საპარლამენტო არჩევნების პროპორციული საარჩევნო სისტემითა და ნულოვანი საარჩევნო ბარიერით ჩატარებას გულისხმობს.

ამასთან, პროექტის მიხედვით, კონსტიტუციის გარდამავალი დებულებებიდან ამოღებულია ჩანაწერი 3%-ანი საარჩევნო ბარიერისა და პოლიტიკური პარტიების ბლოკების შესახებ.

კონსტიტუციური კანონის გარდამავალ დებულებებში გაწერილი ფორმულის მიხედვით, იმისათვის, რომ განისაზღვროს რამდენი მანდატი მიიღო პარტიამ, მის მიერ მიღებული ხმების რაოდენობა 150-ზე გამრავლდება და ყველა პარტიის მიერ მიღებული ხმების რაოდენობაზე გაიყოფა. მიღებული მთელი რიცხვი პარტიის მიერ მიღებული მანდატების რაოდენობა იქნება.

ცნობისთვის, საარჩევნო სისტემასთან დაკავშირებით კონსტიტუციური ცვლილებების საკუთარი ვარიანტი პარლამენტს ოპოზიციურმა პარტიებმაც შესთავაზა.

მათი პროექტით, 2020 წლის არჩევნები პროპორციული სისტემით ტარდება, თუმცა, 3%-იანი ბარიერისა და პარტიების ბლოკების დაშვებით.