გორში, ავარიაში მოყოლილი საპატრულო პოლიციის ავტომობილი და სამართალდამცავთა შესაძლო ზეწოლა ჟურნალისტზე

გორში, ავარიაში მოყოლილი საპატრულო პოლიციის ავტომობილი და სამართალდამცავთა შესაძლო ზეწოლა ჟურნალისტზე - რას ამბობენ შსს-ში

სამართალი - 18:59, 10 Jun, 2019

1626

შინაგან საქმეთა სამინისტროს გორში მომხარ შემთხვევასთან დაკავშირებით ინფორმაციას ავრცელებს. საუბარია ჟურნალისტ საბა წიწიკაშვილის მიერ დღეს გავრცელებულ ინფორმაციაზე, რომლის თანახმადაც, გორის პოლიციის თანამშრომლებმა შიდა ქართლის საინფორმაციო ცენტრის ჟურნალისტ ფიზიკური შეურაცხყოფა მიაყენეს და პროფესიულ საქმიანობაში ხელი შეუშალეს.

„ნიუპოსტის“ კორესპონდენტის ცნობით, შემთხვევა წუხელ, გვიან ღამით, ცენტრალურ საავტომობილო მაგისტრალზე, მდინარე ლიახვის ხიდზე იმ დროს მოხდა, როდესაც ჟურნალისტი ავტოსაგზაო შემთხვევას აშუქებდა.

შინაგან სამეთა სამინისტროში აღნიშნავენ, რომ პოლიციელთა მხრიდან ჟურნალისტის მიმართ შესაძლო გადაცდომას სამინისტროს გენერალური ინსპექცია შეისწავლის.
რაც შეეხება ავტოსაგზაო შემთხვევას, გახარიას უწყებაში აღნიშნავენ, რომ პოლიციის ავტომობილი ძარცვის ბრალდებით დაკავებულმა ახალგაზრდამ გაიტაცა. შემთხვევა კი ავარიით დასრულდა:
"შინაგან საქმეთა სამინისტროს შიდა ქართლის პოლიციის დეპარტამენტის გორის რაიონული სამმართველოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, წარსულში ქურდობისთვის ნასამართლევი და ამჟამად პირობითი მსჯავრის ქვეშ მყოფი არასრულწლოვანი - 2001 წელს დაბადებული კ.წ., ძარცვის ბრალდებით, გორის მუნიციპალიტეტის სოფელ ორთაშენში დააკავეს. ჩადენილი დანაშაული 5-დან 8 წლამდე ვადით თავისუფლების აღკვეთას ითვალისწინებს.

დღეს გამთენისაას გორში, დ. გურამიშვილის ქუჩაზე, ტარდებოდა ოპერატიული ღონისძიება, რა დროსაც ალკოჰოლური თრობის ქვეშ მყოფმა არასრულწლოვანმა, კ.წ. -მ ისარგებლა შექმნილი გარემოებით, ჩაჯდა სამართალდამცველის სამსახურებრივ მანქანაში და დიდი სისწრაფით თბილისი-სენაკი-ლესელიძის ჩქაროსნულ ავტომაგისტრალზე გავიდა. მან ვერ უზრუნველყო ავტომანქანის უსაფრთხო მართვა და ავტომაგისტრალზე მოძრავ „ფორდ ტრანზიტს“ შეეჯახა. კ.წ.-მ ავტომობილი შემთხვევის ადგილზე მიატოვა, თავად კი მიიმალა. შემთხვევის შედეგად არავინ დაშავებულა.

სამართალდამცველებმა მის ადგილსამყოფელს მალევე მიაკვლიეს და დააკავეს.
გამოძიება საქართველოს სსკ-ს 178-ე მუხლის მე-3 ნაწილის „ე“ ქვეპუნქტით მიმდინარეობს.
ავტომაგისტრალზე მომხდარი ავტოსაგზაო შემთხვევის გადაღების მიზნით, ადგილზე მივიდა შიდა ქართლის ადგილობრივი მედიასაშუალების, „qartli.ge“-ის რედაქტორი, საბა წიწიკაშვილი, რომელიც აცხადებს, რომ მას სამართალდამცველებმა პროფესიულ საქმიანობაში ხელი შეუშალეს და შემთხვევის ადგილის დატოვება მოსთხოვეს.

მომხდარზე შინაგან საქმეთა სამინისტროს გენერალურმა ინსპექციამ მოკვლევა უკვე დაიწყო"- აცხადებენ უწყებაში.