სამართალდამცავებმა ბათუმის მერიის 7 თანამშრომელი დააკავეს. დაკავებულთა შორის არიან ვიცე-მერი თენგიზ პეტრიძე და აჭარის განათლების მინისტრის მოვალეობის შემსრულებელი, ბაგრატ მანველიძე. პოლიციამ აიყვანა ნუკრი ხინთიბიძე, ბექა ხალვაში და ერგასლან ლომაძე. დაკავებულია ბათუმის ყოფილი მერი გიორგი ერმაკოვი.

დაკავებულ მაღალჩინოსნებს ბრალს დღეს წაუყენებენ.

როგორც ბათუმის ყოფილი მერის, გიორგი ერმაკოვის ადვოკატმა ჯემალ კიკნაძემ განაცხადა, მისი დაცვის ქვეშ მყოფი უკანონოდ არის დაკავებული და მას დანაშაული არ ჩაუდენია.

“უკანონოდ არის დაკავებული, მას არანაირი დანაშაული არ ჩაუდენია. ამასთან დაკავშირებით ჩვენ შესაბამის ორგანოებს წარვუდგენთ შესაბამის მტკიცებულებებს. საქმის მასალებს არ ვიცნობთ, ჩაგვბარდება საქმის მასალები და შემდგომში, როდესაც ყველა მტკიცებულებას გავეცნობით, შეგვეძლება პასუხის გაცემა. ერთადერთი იმას მოგახსენებთ, რომ კომპანია რამდენად იყო გაყალბებული დოკუმენტებით, ეს ბატონი გიორგისთვის არ იყო ცნობილი" - აღნიშნა ადვოკატმა.

გამოძიება მილიონ-ნახევარი ლარის უკანონო გაფლანგვას და სამსახურებრივი უფლებამოსილების ბოროტად გამოყენებას ბათუმის ყოფილ მერს გიორგი ერმაკოვს, ბათუმის მოქმედ ვიცე მერს, ფინანსთა და განათლების მინისტრების ორ მოადგილეს და მერიის 3 მაღალჩინოსანს ედავება.