ბედნიერება "მეექვსე ცნობიერსა" და "გონების სიმშვიდეზეა" დამოკიდებული და არა გრძნობის 5 ორგანოსა და მატერიალურ შენაძენებზე, - აცხადებს 83 წლის დალაი-ლამა.

"ნამდვილი ბედნიერება მეექვსე ცნობიერზეა დამოკიდებული. ბუდიზმში ცნობიერის 5 სახეობაა გამოყოფილი, რომელიც გრძნობის 5 ორგანოსთან არის კავშირში და მეექვსე ცნობიერი - მენტალურთან. რეალურ ბედნიერებას არა შეგრძნებები, არამედ მენტალური ხასიათის განცდები იწვევს. შესაბამისად, თუ თქვენ უსიამოვნო განცდები გაქვთ, რომელიც გრძნობის 5 ორგანოს უკავშირდება, მენტალურ დონეზე გარკვეული ვარჯიშების ჩატარების შემდეგ, თქვენ გონების სიმშვიდეს მიაღწევთ," - აცხადებს დალაი-ლამა.

მისი თქმით, დღევანდელ მსოფლიოში განათლების სისტემა, ზოგადად, მატერიალური სიკეთეების მიღებაზეა მიმართული, მაგრამ მატერიალური კეთილდღეობა მხოლოდ ჩვენს გრძნობებს აკმაყოფილებს.

მისი აზრით, სასიამოვნო ხედები, გარეგნობა, მუსიკა, სპორტული ასპარეზობები, გემრიელი საჭმელი, სექსი, სასიამოვნო სუნი - ეს ყველაფერი ჩვენ სიამოვნებას გვანიჭებს. თუმცა, ასეთი ბედნიერება არამდგრადია.

"თუ თქვენ გაქვთ გარკვეული მატერიალური საბაბი ბედნიერებისათვის, თქვენ ბედნიერი ხართ, მაგრამ როდესაც ის გაქრება, თქვენ მხოლოდ მოგონებები დაგრჩებათ," - აცხადებს დალაი-ლამა.

"მენტალური ცნობიერი ყველა იმ ცნობიერზე მაღლა დგას, რომელის ადამიანის 5 გრძნობას უკავშირდება, მაგრამ რადგან ჩვენ მატერიალისტური ცხოვრებით ვცხოვრობთ, ჩვენ გრძნობების ტყვეობაში ვართ. ჩვენ საკუთარ თავზე მენტალურ დონეზე უნდა ვიმუშავოთ, და გონებრივ სიმშვიდეს უნდა მივაღწიოთ," ამბობს ის.