ყაჩაღობა რუსთავში და დასახიჩრების მუქარით წაღებული ფული, ოქრო და ტელეფონი - სასამართლომ ბრალდებულებს განაჩენი გამოუტანა

სამართალი - 12:04, 27 May, 2019

981

რუსთავის საქალაქო სასამართლომ გაიზიარა ბრალდების მხარის მიერ წარდგენილი მტკიცებულებები და ჯგუფურად ჩადენილ ყაჩაღობაში ბრალდებულები ე.გ და ე.რ დამნაშავედ ცნო. ამის შესახებ ინფორმაციას პროკურატურა ავრცელებს:

„სასამართლოში წარდგენილი მტკიცებულებებით დადასტურდა, რომ 2018 წლის 5 დეკემბერს, ე.რ.-მ და არასრულწლოვანმა ე.გ.-მ, თანამზრახველთან ერთად ქ. რუსთავში, ე. დ.-ს საცხოვრებელ ბინაში მოტყუებით შეაღწიეს, რა დროსაც დანით ჯანმრთელობის დაზიანების და დასახიჩრების მუქარით ე.დ.-ს კუთვნილი თანხა, ოქროს ნივთები, მობილური ტელეფონი გაიტაცეს და შემთხვევის ადგილიდან მიიმალნენ.

სამართალდამცველებმა ე. რ. და ე.გ. 2019 წლის 7 დეკემბრს ქ.რუსთავში დააკავეს. მათ ბრალდება საქართველოს სისხლის სამართლის კოდექსის 179-ე მუხლის მეორე ნაწილის ,,ბ’’ და მესამე ნაწილის ,,ბ’’ ქვეპუნქტებით (ყაჩაღობა, ესე იგი თავდასხმა სხვისი მოძრავი ნივთის მართლსაწინააღმდეგო მისაკუთრების მიზნით, ჩადენილი სიცოცხლისათვის საშიში ძალადობის გამოყენების მუქარით, ჩადენილი ჯგუფურად, ბინაში უკანონო შეღწევით) წარედგინათ და აღკვეთის ღონისძიების სახით პატიმრობა შეეფარდათ.

რუსთავის საქალაქო სასამართლომ ე.რ. და ე.გ. დამნაშავედ ცნო წარდგენილ ბრალდებაში და სასჯელის სახედ და ზომად ე.რ.-ს 8 წლით, ხოლო ე.გ.-ს არასრულწლოვანთა მართლმსაჯულების კოდექსით 4 წლით თავისუფლების აღკვეთა განუსაზღვრა.“- აღნიშნულია უწყების განცხადებაში.