პოლიციამ გურიაში მომხდარი ქურდობის ფაქტი ცხელ კვალზე გახსნა და დამნაშავე დააკავა.

"შინაგან საქმეთა სამინისტროს გურიის პოლიციის დეპარტამენტის ოზურგეთის რაიონული სამმართველოს თანამშრომლებმა, ჩატარებული ოპერატიულ-სამძებრო და საგამოძიებო მოქმედებების შედეგად, 1998 წელს დაბადებული, წარსულში ნასამართლევი და ამჟამად პირობითი მსჯავრის ქვეშ მყოფი ა.კ., ქურდობის ბრალდებით დააკავეს.

მის მიერ ჩადენილი დანაშაული 3-დან 7 წლამდე ვადით თავისუფლების აღკვეთას ითვალისწინებს.

გამოძიებით დადგინდა, რომ ბრალდებულმა მიმდინარე წლის 17 მაისს, ოზურგეთის მუნიციპალიტეტის დაბა ურეკში მყოფი ტურისტის, რუსეთის ფედერაციის მოქალაქის კუთვნილი ავტომანქანიდან მობილური ტელეფონი, პლანშეტი, ფოტოაპარატი და ფული მოიპარა, რის შემდეგაც შემთხვევის ადგილიდან მიიმალა.

სამართალდამცველებმა, ცხელ კვალზე ჩატარებული ოპერატიულ-საგამოძიებო ღონისძიებების შედეგად ა.კ., მომხდარიდან რამდენიმე საათში ამხილეს, მოგვიანებით კი, მოსამართლის განჩინების საფუძველზე, ლანჩხუთის მუნიციპალიტეტის სოფელ ღრმაღელეში, საკუთარ საცხოვრებელ სახლში დააკავეს.

პოლიციამ, ბრალდებულის მიერ გადამალული ნაქურდალი ნივთები ნივთმტკიცებად ამოიღო.

დაკავებული ჩადენილ დანაშაულს აღიარებს.

გამოძიება არაერთგზის ჩადენილი ქურდობის ფაქტზე მიმდინარეობს, რამაც მნიშვნელოვანი ზიანი გამოიწვია, საქართველოს სსკ-ის 177-ე მუხლის მე-2 ნაწილის „ა“ და მე-3 ნაწილის „ბ“ ქვეპუნქტებით" - აღნიშნულია შსს-ს მიერ გავრცელებულ ინფორმაციაში.