7 თვის ბავშვის მკვლელობა აღაიანში - არასრულწლოვან დედაზე შსს-ში ინფორმაცია 2-ჯერ იყო შესული

სამართალი - 21:17, 22 May, 2019

4232

აღაიანში მომხდარი მკვლელობის გამოძიების პარალელურად, სადაც არასრულწლოვანს ბრალი საკუთარი 7 თვის შვილი მკვლელობაში ედება, კიდევ ერთი მოკვლევა მიმდინარეობს. შინაგან საქმეთა სამინისტროს გენერალურმა ინსპეციამ უნდა დაადგინოს რამდენად სწორად შეაფასა პოლიციამ 2017 და 2018 წლებში აღნიშნულ არასრულწლოვანთან დაკავშირებით მიღებული ინფორმაცია, გენერალური ინსპექციის მიერ დადგინდება ქონდა თუ არა ადგილი პოლიციის მუშაკების მხრიდან რაიმე სახის გადაცდომას ან სამსახურეობრივ გულგრილობას. ინფორმაციას ამის შესახებ შსს ავრცელებს

„2017 წლის სექტემბერში შინაგან საქმეთა სამინისტროში შემოვიდა შეტყობინება არასრულწლოვანი მ. შ.-ს სახლიდან წასვლის შესახებ. პოლიციამ დაადგინა არასრულწლოვნის ადგილსამყოფელი და გამოკითხა იგი. არასრულწლოვანმა გამოკითხვისას არ დაადასტურა მის მიმართ რაიმე დანაშაულის ჩადენის ფაქტი.

ასევე, 2018 წლის ოქტომბერში შინაგან საქმეთა სამინისტროს მ. შ.-ს ბავშვის დაბადების რეგისტრაციის შესახებ აცნობა იუსტიციის სამინისტროს სახელმწიფო სერვისების განვითარების სააგენტომ. აღნიშნულ ფაქტზე გამოძიება არ დაწყებულა.

შინაგან საქმეთა სამინისტროს გენერალური ინსპექციის მიერ დაწყებულია მოკვლევა, რამდენად სწორად შეაფასა პოლიციამ 2017 წელს მოპოვებული ინფორმაცია და 2018 წელს სახელმწიფო სერვისების განვითარების სააგენტოსაგან შემოსული შეტყობინება.

ამ ეტაპზე, აღნიშნულ ფაქტზე არასათანადო რეაგირებისათვის უფლებამოსილება შეუწყდა 1 თანამშრომელს.

გენერალური ინსპექციის მიერ დადგინდება ქონდა თუ არა ადგილი პოლიციის სხვა მუშაკების მხრიდან რაიმე სახის გადაცდომას ან სამსახურეობრივ გულგრილობას. დადებით შემთხვევაში დადგება შესაბამის პირთა პასუხისმგებლობის საკითხიც.“- აღნიშნულია უწყების განცხადებაში.