„ყველას პირობითი აქვს, ხომ გადაამტერეს ერთმანეთს ეს ბავშვები, მთავრობამ, მთელმა პროკურატურამ შეაწმინდეს ხელი ბოლომდე" - მოზარდების მკვლელობის საქმეზე დაკავებული დ.ღ-ს მამა

სამართალი - 19:09, 22 May, 2019

1508

თბილისში, ხორავას ქუჩაზე მკვლელობის საქმის ერთ-ერთ მთავარ მოწმეს, დ.ღ-სთვის პატიმრობის შეფარდებას სასამართლოში ხმაური მოჰყვა. მოსამართლის გადაწყვეტილება, არასრულწლოვნის ოჯახის წევრებმა გააპროტესტეს. მოზარდის მამა ამბობს, რომ ყველამ ხელი მის შვილს "შეაწმინდა" .
მსჯავრდებულის მამა გადაწყვეტილებას ხელისუფლების დაკვეთას უწოდებს.

„ყველას პირობითი აქვს, ხომ გადაამტერეს ერთმანეთს ეს ბავშვები, ყველა ერთმანეთს დაუპირისპირეს. მთავრობამ, მთელმა პროკურატურამ შეაწმინდეს ხელი ბოლომდე და ესე გაგვიმეტეს“ - აცხადებს დაკავებულის მამა.

სასამართლოს მიერ დღეს მიღებულ გადაწყვეტილებას პოლიტიკურს უწოდებს დაკავებული დ.ღ-ს უფლებადამცველიც.

„ეს განაჩენი იმიტომ არის პოლიტიკური, რომ ახლა უნდათ სხვა არასრულწლოვნების სავარაუდოდ, დაკავება და დაჭერა. პლუს იმას, რომ იმ განაჩენზე, თითქოს თქვან, რომ მოწმეების გამო ვერ დადგა მართლმსაჯულება. იქ როდესაც საუბარია, ვისზეც ამბობდნენ, რომ დ.ღ.-მ ცრუ ჩვენება მისცა და ცრუ ინფორმაცია მიაწოდაო, არ მისული პიროვნების ჩვენება საერთოდ არ აქვთ მოსამართლეებს გაზიარებული“ - აცხადებს ადვოკატი.

ბრალდების მხარის ინფორმაციით, სასამართლოზე წარმოდგენილი მტკიცებულებების საფუძველზე, დ.ღ. სასამართლომ წარდგენილ ბრალდებაში სრულად სცნო დამნაშავედ.