პანკისის ხეობაში ჩატარებული სპეცოპერაციისას მოკლული 19 წლის თემირლან მაჩალიკაშვილის მამა მალხაზ მაჩალიკაშვილი, სახელმწიფო უსაფრთხოების სამსახურში დაკითხვაზე დღეს უნდა გამოცხადდეს.

საუბარია „ტერორისტული აქტის მომზადების მცდელობის“ საქმეზე, რომელსაც სუს–ის მტკიცებით, მალხაზ მაჩალიკაშვილი თავის ძმისშვილთან ერთად ვახტანგ გომელაურის ყოფილი პირველი მოადგილის, სოსო გოგაშვილის წინააღმდეგ გეგმავდა.

მაჩალიკაშვილი სუს–ში დაკითხვაზე მეორედ გუშინ იყო დაბარებული, თუმცა, ადვოკატის მოუცლელობის გამო, მისი დაკითხვა დღეისათის გადაიდო.

შეგახსენებთ, რომ სახელმწიფო უსაფრთოების სამსახურმა მაჩალიკაშვილი დაკითხვაზე ორი დღის წინ დაიბარა, თუმცა, მან გამოცხადებაზე უარი განაცხადა. შედეგად, სუს–ში ბრიფინგი გაიმართა, რომლის ფარგლებშიც გაავრცელეს აუდიოჩანაწერი, სადაც უსაფრთხოების სამსახურის მტკიცებით, მაჩალიკაშვილი თავის ძმისშვილს გოგაშვილის თვალთვალს ავალებს.