9 წლის გოგონას სასტიკი მკვლელობა გორში - ადვოკატის განცხადებით, მკვლელობის დროს იაგო ნებიერიძე სახლში იმყოფებოდა

სამართალი - 18:46, 02 May, 2019

2557

დღეს,სასამართლოში გორში სასტიკად მოკლული 9 წლის გოგონას საქმეზე ბრალდების მხარის მოწმეების ჩვენებებს მოუსმინეს.

სხდომაზე ექსპერტ-კრიმინალისტები, სამხარაულის სახელობის ექსპერტიზის ბიუროს ექსპერტები და საქმის გამომძიებლები დაკითხეს.

ბრალდების მხარის განცხადებით, მოწმეებმა დაადასტურეს მათ მიერ ჩატარებული საგამოძიებო მოქმედებების სისწორე, მათ შორის იმ ვიდეო ჩანაწერზე, რომელიც ბრალდების მხარის ერთერთი მნიშვნელოვანი მტკიცებულებაა.

„მოწმედ გამოკითხულმა ექსპერტებმა მათ მიერ ჩატარებულ სხვადასხვა სახის ექსპერტიზის დასკვნასთან დაკავშირებით ისაუბრეს, დაადასტურეს გაცემული დასკვნების სისწორე, რომელიც მნიშვნელოვან გარემოებებს შეიცავს. ასევე გამომძიებლებმა დაადასტურეს, მათ მიერ ჩატარებული საგამოძიებო მოქმედებები და მათი სისწორე. ამოღებულ კვლევებზე, ასევე ვიდეო ჩანაწერზე ჰაბიდოსკოპიური და ფონოსკოპიური ექსპერტიზების ჩამტარებელი ექსპერტები დაიკითხნენ“, განაცხადა საქმის პროკურორმა ნანა გუგუტიშვილმა.

დაცვის მხარის განცხადებით, პირდაპირი მტკიცებულება იაგო ნებიერიძის ბრალის დამადასტურებელი ბრალდებას არ წარმოუდგენია. ასევე ადვოკატი აცხადებს, რომ შემთხვევის დროს მას ნებიერიძემ უთხრა რომ ის სახლში იმყოფებოდა.

„ექსპერტიზის დაკვნები მრავლად არის ჩატარებული, მაგრამ საქმეში რაიმე არსებითი არ არის ისეთი, რომელიც პირდაპირ მიუთითებდა იაგო ნებიერიძის მიერ დანაშაულის ჩადენაზე. ასეთი პირდაპირი მტკიცებულება ჯერ-ჯერობით არაფერი გვინახავს და რა საპროცესო და საგამოძიებო მოქმედებებშიც ღებულობენ მონაწილეობას გამომძიებლები იმას ადასტურებენ. ამბობენ, რომ გამოიტანეს დადგენილება, დანიშნეს ექსპერტიზები, ნიმუში აიღეს – რაც გააკეთეს იმაზეა საუბარი. ნებიერიძე ჯერ არაფერს ამბობს, ამბობს რომ ჩვენებას მისცემს. ხოლო ჩემთან რაც არ უნდა თქვას, მაგაზე კომენტარს ვერ გავკეთებ. მაგას ისიც ეყოფა, რომ საინფორმაციო ომი აქვს გამოცხადებული და ლამის უკვე ვერდიქტი აქვს გამოტანილი საინფორმაციო წყაროებიდან. რა თქმა უნდა, ირღვევა მისი უფლებები.

მე არ ვიცი, არ მინახავს ჯერ ისეთი პირდაპირი მტკიცებულება,რომელიც პირდაპირ დაადასტურებდა მის ბრალეულობას“, – განაცხადა ადვოკატმა მარიამ პაპოშვილმა.

კითხვაზე დროის იმ მონაკვეთში როდესაც დანაშაული მოხდა სად იმყოფებოდა ბრალდებული იაგო ნებიერიძე, ადვოკატი ამბობს, რომ მას მისი დაცვის ქვეშ მყოფმა უთხრა ის სახლში იყო და ამის მოწმე მხოლოდ მისი დედაა.

„იაგო ამბობს სახლში ვიყავიო. დედამისი ადასტურებს ამას“, – განაცხადა ადვოკატმა მარიამ პაპოშვილმა.

ადვოკატის ცნობით ნებიერიძე ამ საქმეზე ამ დრომდე დუმილის უფლებას იყენებს, თუმცა ადვოკატის განცხადებით, ის ჩვენებას აუცილებლად მისცემს სასამართლოს.