ინტერნეტში ვიდეო ვრცელდება, რომელშიც საბავშვო ბაღის გამგე ქალი ბავშვზე სხვა ბავშვების თანდასწრებით სიტყვიერად და ფიზიკურად ძალადობს. ყველაფერი ორი ზრდასრული ქალის თვალწინ ხდება, თუმცა ისინი არანაირ რეაგირებას არ ახდენენ.

შემთხვევა, რუსეთში, კრასნოდარში მოხდა, ვიდეოს ავტორი ქალია, რომელიც ვიდეოს შორიდან იღებს და კადრს მიღმა ცდილობს თავის გაკვირვებულ და შეშინებულ შვილს აუხსნას, თუ რა ხდება საბავშვო ბაღის ეზოში.

საბავშვო ბაღის გამგე უხეში ძალის გამოყენებით ბავშვს მუხლებზე აყენებს და აიძულებს რუსეთის მიწას აკოცოს. როგორც ქალის საუბრიდან ჩანს ის ბავშვს ადანაშაულებს, თითქოს 5 წლის ბიჭმა განაცხადა, რომ „რუსული მიწა სძულს“. ვიდეოში ის ნაციონალიზმზე და მორალზე ლაპარაკობს.

მომხდართან დაკავშირებით, რუსულ მედიაში ბაღის გამგის კომენტარიც გავრცელდა, მისი თქმით, 5 წლის ბიჭი რთული ბავშვია, მისი ოჯახი კრასნოდარში საცხოვრებლად ერთ-ერთი სამხრეთ რესპუბლიკიდან მოვიდა. ბაღის გამგის თქმით, ბავშვმა გადმოსვლისთანავე დაიწყო სხვა ბავშვების შეწუხება. მისი განმარტებით ასეთი მკაცრი მეთოდით გადაწყვიტა, რომ ბავშვისთვის იმ მიწის დაგფასება ესწავლებინა, რომელიც მას კვებავს. ბავშვთან ჩხუბის დროს ბაღის გამგე მას ცხოველსა და ნაბიჭვარს უწოდებს.

აღნიშნულ ფაქტთან დაკავშირებით სამართალდამცავებმა მოკვლევა დაიწყეს.