დავით კირკიტაძის მომდევნო სასამართლო პროცესი 3 მაისს ჩაინიშნა

სამართალი - 15:40, 19 Apr, 2019

767

დღეს გურჯაანის რაიონულ სასამართლოში დავით კირკიტაძის მორიგი სასამართლო პროცესი გაიმართა. მოსამართლის გადაწყვეტილებით სხდომა კვლავ დახურულ რეჟიმში წარიმართა და მასზე ბრალდების მხარის 4 მოწმე დაკითხეს,

კირკიტაძის ადვოკატის, გიორგი კონდახიშვილის განმარტებით, განსაკუთრებულ დავალებათა დეპარტამენტის თანამშრომლებმა 16 დეკემბერს განვითარებულ მოვლენებთან დაკავშირებულ კითხვებს უპასუხეს. შემდეგ სასამართლო პროცესებზე კი დაცვის მხარის მტკიცებულებების მოკვლევა დაიწყება.

„ამჟამად ჩვენ ვიკვლევთ ბრალდების მხარეს მტკიცებულებებს. გამოცხადდა 4 მოწმე, ესენი იყვნენ შინაგან საქმეთა სამინისტროს თანამშრომლები, რომლებმაც აღიდგინეს იმ დღევანდელი მოვლენები, კონკრეტულად ინაუგურაციასთან დაკავშირებით და საზოგადოების ფაქტობრივად ველისციხეში განვითარებულ მოვლენებზე იყო საუბარი. უკეთესი იქნება ყველაფერი ეს ღია საჯარო პროცესზე ჩატარდეს ხოლმე, რა თქმა უნდა არის მაღალი საზოგადოებრივი ინტერესი. არგუმენტაციით შევეცადეთ მოსამართლე დაგვერწმუნებინა, რომ არავითარი წესრიგის დარღვევის პრეცედენტები არ ყოფილა იმდაგვარი, რომ საბოლოოდ ყოფილიყო სხდომა დახურული, თუმცა სამწუხაროდ არ იქნა ეს გათვალისწინებული,“ - განაცხადა გიორგი კონდახიშვილმა.

მორიგი სასამართლო პროცესი გურჯაანის რაიონულ სასამართლოში 3 მაისს ჩაინიშნა