ჭიდაობის ფედერეაციის პრეზიდენტის გეგა გეგეშიძის ადვოკატი მარინა ქურციკიძე ავრცელებს ინფრომაციას, რომ ზურაბ დათუნაშვილს, ერთ-ერთ ქვეყანაში ფიზიკური დაპირისპირების გამო, შენგენის ზონაში შესვლა აეკრძალა, თუმცა ამ ინფორმაციას თავად დათუნაშვილი უარყოფს.

„მომივიდა ინფორმაცია, რომ ჩხუბის გამო რომელიღაც ქვეყანაში პრობლემები აქვსო, მაგრამ ეს სიცრუეა, მინდა გითხრათ. ეს ხალხი რაზე საუბრობს ვერ ვხვდები. ჩხუბის გამო მე არავისთან, რომელიმე ქვეყნის სამართალდამცველებთან პრობლემა არ შექმნია. რომც შემქმნოდა მე ეს პრობლემა ვინმესთან, ამ საქმესთან რა შუაშია, ეს ხალხი რას ხლართავს ერთმანეთში ვერ ვხვდები,“ - ამბობს დათუნაშვილი.

შეგახსენებთ: თბილისის საქალაქო სასამართლოში საქართველოს ჭიდაობის ფედერაციის პრეზიდენტის საქმის არსებითი განხილვა იწყება. გეგეშიძეზე სისხლის სამართლის საქმე სპორტის სასახლეში მომხდარი დაპირისპირების გამო აღიძრა, როდესაც ის თავს დაესხა ევროპის ჩემპიონს, ზურაბ დათუნაშვილს.

გეგა გეგეშიძე აღნიშნული ინციდენტის გამო დააკავეს, თუმცა, სასამართლომ ის გირაოს სანაცვლოდ გაათავისუფლა, რის შემდეგაც გეგეშიძემ ფედერაციის პრეზიდენტის თანამდებობაზე მუშაობა კვლავ გააგრძელა.