„მათრიეს მიწაზე, ვუთხარი, ვალიდოლი მაქვს, გულზე სტენდი მაქვს ჩასმული, რას აკეთებთ-თქო“ - მოქალაქე პოლიციას ძალადობაში ადანაშაულებს

შემთხვევა - 15:26, 01 Apr, 2019

2594

გურიაში მცხოვრები ნუგზარ შურუპოვი პოლიციას ფიზიკურ ძალადობაში ადანაშაულებს.
მოქალაქის მტკიცებით, ძალადობის შედეგად მას კლინიკაში მოთავსება დასჭირდა. ნუგზარ შურუპოვის თქმით, მას გულის შეტევა დაემართა.

მოქალაქე ირწუნება, რომ სამართალდამცველთან უსამართლოდ გამოწერილ ჯარიმას აპროტესტებდა, რა დროსაც მასზე იძალადეს.

"მოვიდნენ და ჯარიმას მიწერდნენ. ამის გამო საბუთები რომ არ მივეცი, მათრიეს მიწაზე, დაგაკავოთ უნდაო. მე ვუთხარი, ვალიდოლი მაქვს, გულზე სტენდი მაქვს ჩასმული, რას აკეთებთ-თქო. სანამ სასწრაფო არ მოვიდა, არ გავიდა არაფერი,"-აცხადებს ნუგზარ შურუპოვი.

ძალადობის ფაქტს კატეგორიულად უარყოფენ შს სამინისტროში. როგორც "ნიუპოსტს" გახარიას უწყებაში უთხრეს, მოქალაქემ უარი განუცხადა პოლიციელებს ვინაობის გამხელაზე და არ წარადგინა მოთხოვნილი პირადობის დამადასტურებელი დოკუმენტები.

უწყების ინფორმაციით, პოლიცია ცდილობდა განემარტა მოქალაქისთვის რომ ის კანონს არღვევდა, რა დროსაც ნუგზარ შურუპოვმა თქვა, რომ ის შეუძლოდ იყო.

შს სამინისტროს პრესსამსახური ამბობს, რომ პოლიციამ გამოიძახა სასწრაფო და მოხდა მამაკაცის კლინიკაში გადაყვანა. კლინიკაში მიუსულმა შურუპოვიმა თქვა, რომ მას პოლიცია გაუსწორდა, რასაც უწყება არ ადასტურებს.

უწყების ცნობით, მამაკაცის სიცოცხლეს საფრთხე არ ემუქრება.