სიცხე მისცა წუხელ... დილით ვნახე და კრიჭა უკვე შეკრული ჰქონდა ბავშვს" - რა გახდა ქარელში 2 წლის ბავშვის გარდაცვალების მიზეზი

შემთხვევა - 18:16, 29 Mar, 2019

5404

ექსპერტიზამ უნდა დაადგინოს რა გახდა ქარელში 2 წლის ბავშვის გარდაცვალების მიზეზი - მცირეწლოვანი ექსპერტიზის ბიუროდან სახლში უკვე გადაასვეეს.

გარდაცვლილი ბავშვის ოჯახის ახლობელი ამბობს, რომ წინა დღეს მცირეწლოვანს სიცხე ჰქონდა, წამალი დაალევინეს. მისივე თქმით, სიცხის დაწევის შემდეგ ბავშვს ჩაეძინა, დილით კი უკვე გარდაცვლილი დახვდათ.

„სიცხე მისცა წუხელ, ციტრამონი დავალევინეთ ნახევარი და დაუწია იმ წუთში. მერე დავაძინეთ, მამასთან ეძინა ყოველთვის, მარტო ახლა კი არა... დილის 06:00 საათზე შემოვარდა ბიჭი და ბაბო, რაღაც ბავშვი ცივიაო, მომარბენინებდა ხელით და მოდი, აბა, ნახე, რა სჭირს, რა მოუვიდა ბავშვსო და ვნახე და კრიჭა უკვე შეკრული ჰქონდა ბავშვს. აქ დაყავდა ხოლმე ამბოლატორიაში, აცრებზე, გასინჯვაზე, თუ რამე პრობლემა იქნებოდა, მიყავდა ხოლმე. არაფერი არ სჭირდა ამ ბავშვს, ასე უცებ არ ვიცი,“ - თქვა ლენა რუტინსკიმ.

პედიატრი, თამარ ოქროპირიძე იხსენებს, რომ ამ შემთხვევამდე ცოტა ხნით ადრე, მცირეწლოვნის უფროსი ძმა ფილტვების ანთებით ქარელის ცენტრალურ საავადმყოფოში სამკურნალოდ გადაამისამართა.

„ოთხშაბათს უფროსი შვილი მომიყვანა დედამ, იმას ფილტვების ანთება დავუდგინე და გავაგზავნე საავადმყოფოში, იმიტომ, რომ ოჯახს წამლის ყიდვის საშუალება არ აქვს. ბავშვები ძალიან შეუფერებელ პირობებში იზრდებიან. გავაგზავნე, გადავურეკე პედიატრსაც, გავაკონტროლე, ბავშვი დააწვინა, ქარელის ცენტრალურ საავადმყოფოში მკურნალობდა, ფილტვების ანთება დაუდგინდა. მეორეც წაუყვანია სასწრაფოს, ისიც ცერემბრალური დამბლით არის ბავშვი, ორი დღის მერე ისიც დაწვა,“ - ამბობს პედიატრი.

ქარელის ცენტრალური საავადმყოფოს ექიმი, ლია გოჩაშვილი ადასტურებს, რომ ამ ოჯახიდან ორი ბავშვი გადის მკურნალობის კურსს.

„ბავშვზე, რომელიც ბინაზე დაიღუპა, არც ოჯახის ექიმს არ უნახია და არც ჩვენთან ექიმთან არ ჰყოლიათ. მე როგორც ვიცი, ბებიის გადმოცემით, არც მკურნალობა არ უტარდებოდა ბინაზე, თუმცა, იმასაც აღენიშნებოდა, ბებიის თქმით, გრიპოზული მოვლენები,“ - განაცხადა ლია გოჩაშვილმა.