"საქართველოს ბანკზე“ თავდამსხმელებმა დაახლოებით, 8 100 ევრო, 13 ათასი დოლარი და 10 ათასი ლარი წაიღეს

სამართალი - 16:11, 12 Mar, 2019

4539

„საქართველოს ბანკის" დაყაჩაღების საქმე - პროკურორი ირაკლი გულდედავა ამბობს, რომ ბრალდებულებმა, 20-21 წლის ბიჭებმა ბანკიდან დაახლოებით, 8 100 ევრო, 13 000 დოლარი და 10 ათასი ლარი წაიღეს.

მისი თქმით, მთელი ღამის განმავლობაში ბრალდებულები დაზარალებულებთან ერთად იმყოფებოდნენ და მათ არ ჰქონდათ თავზე არაფერი ჩამოფარებული. სწორედ ასე შეძლეს ბრალდებულთა ამოცნობა.

სასამართლომ გლდანში „საქართველოს ბანკზე“ თავდასხმისთვის ბრალდებულ პირებს პატიმრობა შეუფარდა.

დაკავებულებს ბრალად ედებათ, ყაჩაღობა, პოლიციელზე თავდასხმა, ცეცხლსასროლი იარაღის მართლსაწინააღმდეგო შეძენა-შენახვა-ტარება და თავისუფლების უკანონო აღკვეთა. ერთ-ერთი ბრალდებული წარსულში ნასამართლევი და ამჟამად პირობითი მსჯავრის ქვეშ მყოფი, 1998 წელს დაბადებული ნიკა ქარსელაძეა, ხოლო მეორე პირი, წარსულში ნასამართლევი, 1999 წელს დაბადებული კახა გამხუაშვილი.

ბრალდებულებმა, ბანკის ფილიალზე ყაჩაღურ თავდასხმამდე, თავისუფლება უკანონოდ აღუკვეთეს 2 მოქალაქეს და კუთვნილი ავტომანქანა ჩამოართვეს. პოლიციის ოპერატიული რეაგირების შედეგად, თავდამსხმელები იძულებული გახდნენ მძევლად აყვანილი ორივე მოქალაქე გაეთავისუფლებინათ და შემთხვევის ადგილიდან გატაცებული ავტომანქანით მიიმალნენ.

აღნიშნული დანაშაული 7-დან 10 წლამდე თავისუფლების აღკვეთას ითვალისწინებს.