ჰიტლერის მიერ პოლონეთში, 11 ადგილას დამალული საგანძური - მასონებმა გერმანიაში ნაცისტი ოფიცრის დღიური გაასაჯაროვეს

ეს საინტერესოა - 15:45, 09 Mar, 2019

2685

The Daily Mail-ის ინფორმაციით, გერმანიაში გამოაქვეყნეს ფაშისტური გერმანიის მაღალჩინოსანი ოფიცრის ეგონ ოლენჰაუერის პირადი დღიური, სადაც მოცემულია დამალული საგანძურების ადგილსამყოფელი.

ოფიცრის ჩანაწერების თანახმად, ჰიტლერის ბრძანებით, პოლონეთის ტერიტორიაზე, გერმანელთა უკანდახევის დროს, 11 სხვადასხვა ადგილას დამალეს დიდი ოდენობით ოქროულობა, სამკაულები, ხელოვნების ნიმუშები. ოლენჰაუერი წერს, რომ ამისთვის ნაცისტებმა 260 სატვირთო ავტომობილი გამოიყენეს.

სავარაუდოდ, სამალავებში 28 ტონამდე ოქრო, ასევე იუველიურული ნაწარმი, რელიგიური დანიშნულების ნივთები, და 47 ხელოვნების ნიმუში, მათ შორის რუბენსის, კარავაჯოს, მონეს, რაფაელის, რემბრანდტის და სხვა მხატვართა სურათებია.

ცნობილია, რომ ეს დღიური წლების მანძილზე ქალაქ კვედლინბურგში (გერმანია) მასონურ ლოჟაში ინახებოდა, ხოლო შემდეგ ფონდ Schlesische Brücke-ს გადაეცა. მასონურმა ლოჟამ, დღიურის გადაცემის დროს ერთი პირობა წამოაყენა - დღიური საჯარო არ უნდა გამხდარიყო იმ დრომდე, სანამ ამ პროცესებთან დაკავშირებული ადამიანები ცოცხლები იყვნენ. დღიურის ნამდვილობა 5 ინსტიტუტმა დაადასტურა, მათ შორის გოტინგენის უნივერსიტეტის ხელოვნების ისტორიის ფაკულტეტის მეცნიერებმა.

ამჟამად სპეციალისტები ამოწმებენ იმ ადგილებს, სადაც დღიურის მიხედვით, საგანძურია დამალული. ამ ადგილებს შორისაა ტბის ფსკერი, პოლონეთის ერთერთი სასახლის საიდუმლო ოთახი, ერთერთ პარკში მდებარე ჭა, ნაკადულის ფსკერზე მდებარე სარკოფაგი, მიწისქვეშა ორანჟერეა და სხვ,

ექსპერტები აცხადებენ, რომ შესაძლოა ყველა მითითებულ ადგილას საგანძური არ აღმოჩნდეს, თუმცა, ლოჟა იმედოვნებს, რომ მისი დიდი რაოდენობა აღმოჩენილი და კანონიერი მფლობელებისთვის დაბრუნებული იქნება. ამასტან ზოგიერთი მათგანი ეჭვს გამოთქვამს, რომ საგანძურს საერთოდ მიაკვლევენ, რადგან მათი განცხადებით, ადამიანები, რომლებმაც იცოდნენ ამ ადგილების შესახებ, ამდენი ხნის განმავლობაში შესაბამისად იმოქმედებდნენ.