ტყის ხანძრები ევროპაში და ყინვა აშშ-ში - კონტრასტული და ანომალიური ამინდი მსოფლიოში

ეს საინტერესოა - 15:32, 01 Mar, 2019

1389

მსოფლიოს მრავალ რეგიონში ანომალიური ამინდი ფაქტიურად ყოველწლიურ მოვლენად იქცა. აღსანიშნავია, რომ 2019 წელი უკვე გამოირჩევა ამ მხრივ გასუკლ წლებთან შედარებით.

მაგალითისთვის, იანვარსა და თებერვალში ტყის ხანძრებმა ევრროპაში 8 თვიან ნორმას გადააჭარბეს, რაც მეცნიერთა შეშფოთებას იწვევს. ატმოსფეროს დაბინძურების მაღალ დონესთან ერთად, თებერვლის თვეში დაფიქსირებულმა მაღალმა ტემპერატურამ დასავლეთ ევროპაში ტყის ხანძრები გამოიწვია.

საგანგებო სიტუაციების ევროპული სააგენტო Copernicus-ის მონაცემებით წელს, 1 მარტისთვის ევროპაში დაფიქსირდა ბუნებრივი გზით წარმოქმნილი ტყის ხანძრის 480 კერა. სააგენტოს მონაცემებით, ეს მონაცემი როგორც წესი ბოლო ათწლეულის აგვისტოს თვის საშუალო მონაცემს ემთხვევა.

2019 წლის პირველ თვეებში ყველაზე მეტად დაზარალდა საფრანგეთი, სადაც 180 ტყიოს ხანძარი დაფიქსირდა. რეკორდი მოხსნა ესპანეთმაც, პორტუგალია ჯერჯერობით საშუალო მაჩვენებლის ზღვარზეა, ხოლო დიდმა ბრიტანეთმა უკვე მიაღწია წლიურ მაქსიმუმს (15 ფართომასშტაბიანი ხანძარი წელიწადში), ირლანდიაში კი სადაც წლიური მაჩვენებელი საშუალოდ 9 ფართომასშტაბიანი ხანძარი ფიქსირდება, იანვარ-თებერვალში უკვე 5 ხანძარი მოხდა.

საპირისპირო სურათია ამერიკის კონტინენტზე - წელს არქტიკულმა ციკლონმა უკვე დაფარა აშშ-ის ჩრდილოეთ რეგიონები და ტემპერატურამ ისეთ ქალაქებში, როგორიცაა ჩიკაგო და დეტროიტი, -45 გრადუსს მიაღწია.

სინოპტიკოსების ინფორმაციით, მარტში ყინვა აშშ-ს კიდევ ერთხელ შეუტევს და მის ცენტრალურ ნაწილს მთლიანად მოიცავს. სიცივეებია აღმოსავლეთ შტატებშიც. სავარაუდოდ, მომავალ უიკენდზე ყინვა ქვეყნის ტერიტორიის 2/3-ს მოიცავს. ყინვა სამხრეთ შტატებსაც მიაღწევს - დაბალი ტემპერატურა მოსალოდნელია მექსიკის ყურესა და ფლორიდის შტატში.

საშუალოდ, ანომალიური ამინდის გამო ტემპერატურა ზამთრის სეზონისთვის 16-22 გრადუსით დაბალი იქნება, რაც უამრავ უარყოფით შედეგებს მოიტანს.