"ძმები კალანდიების ჩვენებები ერთმანეთს კატეგორიულად ეწინააღმდეგება... ადგილი აქვს, ჩემი დაცვის ქვეშ მყოფისთვის ისეთი დანაშაულის დაბრალებას"- კაკაბაძე

სამართალი - 19:23, 26 Feb, 2019

1127

სააპელაციო სასამართლომ დღეს ბრალდების ბოლო მოწმეს - ლუკა კალანდიას, მოუსმინა.

ადვოკატების მტკიცებით, ლუკა კალანდიას დღევანდელი ჩვენება მისივე ძმის - მიხეილ კალანდიას, ჩვენებასთანაც წინააღმდეგობაში მოდის.

„ლუკა კალანდიას ჩვენება თითქმის, ყველა დეტალთან დაკავშირებით, კატეგორიულ წინააღმდეგობაშია მისი ძმის სასამართლოში მიცემულ ჩვენებასთან. საერთოდ, შეუძლებელი და წარმოუდგენელია, სასამართლო ენდოს ისეთი მოწმეების ჩვენებებს, რომლებიც დაკითხვისას ყოველ ჯერზე ჩვენებებს ცვლიან.

ლუკა კალანდიას არ დაუდასტურებია რომელიმე პირის მხრიდან მის ძმაზე ზემოქმედების მოხდენის ფაქტი. მისი ძმა დავკითხეთ, რომელმაც ისაუბრა, თითქოს, მასზე მოხდა ზემოქმედება და ამ დროს თითქოს, ლუკა კალანდია მასთან ერთად იმყოფებოდა. თუმცა, ლუკა კალანდიამ აღნიშნული უარყო. ორი მოწმის ჩვენება, რომელიც ბრალდების მხარემ წარმოადგინა, ერთმანეთს კატეგორიულად ეწინააღმდეგება.

ბოლო დაკითხვის დროს, მ.კ.-მ კატეგორიულად განაცხადა, რომ მასზე არასდროს, არანაირი ზემოქმედება არ მოუხდენია. დღეს კი, ბრალდება გვიმტკიცებს, რომ მასზე თითქოს, განხორციელდა ზემოქმედება. მაშინ ვსვამთ კითხვას, როდის ამბობს მოწმე სიმართლეს, პირველი, მეორე, მესამე დაკითხვის დროს თუ, თბილისის სააპელაციო სასამართლოში დაკითხვის დროს.

ადგილი აქვს, ჩემი დაცვის ქვეშ მყოფისთვის ისეთი დანაშაულის დაბრალებას, რომელიც სინამდვილეში სხვა პირს აქვს ჩადენილი. ჩვენ ყველა შესაძლო მეთოდით, კანონიერი გზით ვიბრძოლებთ და არ დავუშვებთ, რომ უდანაშაულო ადამიანს გადააბრალონ სხვა პირის მიერ ჩადენილი დანაშაული“, - დასძენს ადვოკატი.

სააპელაციო სასამართლოში საქმის განხილვა 13 მარტს დაცვის მხარის მტკიცებულებების გამოკვლევით გაგრძელდება.