ზუგდიდის მეექვსე საჯარო სკოლის ყოფილი დირექტორის ია კერზაიას გარდაცვალების საქმე - ბაჩანა შენგელია გენერალურ პროკურატურაში გამოკითხვაზე იმყოფება. შენგელიას თქმით, გამოძიებას წარუდგენენ მოპოვებულ მტკიცებულებებს, რომელიც ვიდეო მასალასაც მოიცავს:

„გვაქვს ახალი მტკიცებულებები, რომელიც ამ თვენახევრის განმავლობაში გამოიკვეთა საქმეში. ვაპირებთ, პროკურატურას მივაწოდოთ დეტალური ინფორმაცია, მტკიცებულებები, ყველა ის ფაქტი, რაც არის ამ დანაშაულის მნიშვნელოვანი დეტალი. თვითონ ფაქტი გამოძიების დაწყების კარგია, თუმცა ეს არ არის გადამწყვეტი. ჩვენთვის ძალიან მნიშვნელოვანია, რომ ეფექტურად და მოკლე ვადაში მოხდეს დამნაშავეთა გამოვლენა. ვიდეომასალები არის გარკვეულწილად ამ დანაშაულის მტკიცებულებითი ნაწილი, თუმცა არის ასევე უფრო მნიშვნელოვანი დოკუმენტური ნაწილი, სადაც არ არის მხოლოდ ვიდეომტკიცებულებებზე საუბარი და შესაბამისად, ვფიქრობ, ერთადერთი, რაც გამოძიებამ უნდა გააკეთოს, არის ის, რომ აღნიშნული მასალები შეკრიბოს, რაც უკვე გვაქვს გაკეთებული, დაკითხოს მოწმეები და წარუდგინოს დამნაშავეებს ბრალი.

ზოგადად ეს საქმე არის შესაძლო ზეწოლისა და პოლიტიკური დევნის საქმე. ბუნებრივია, ყველა დოკუმენტი რაც ჩვენ გაგვაჩნია, უკავშირდება ამ საქმეს და საბოლოო ჯამში პოლიტიკური ზეწოლის ნაწილია“,-აცხადებს ბაჩანა შენგელია.