ძველი თბილისის პოლიციის პირველი სამმართველოს ერთ-ერთი მაღალჩინოსანი თანამდებობიდან გაათავისუფლეს. პოსტი პოლიციელს, სავარაუდოდ, მოზარდებზე განხორციელებული ძალადობის ფაქტის გამო დაატოვებინეს. სავარაუდოდ საუბარია დანაშაულში მხილებულ არასრულწლოვნებზე, რომლებზეც ფიზიკურად პოლიციის განყოფილებაში იძალადეს.

„შსს-მ მიმართა საქართველოს გენერალურ პროკურატურას, გამოძიების დაწყებისა და დანაშაულის შესაძლო ფაქტზე სისხლის სამართლებრივი დევნის დაწყებასთან დაკავშირებით. გენერალურმა პროკურატურამ გამოძიება დაიწყო 333-ე მუხლის მე-3 ნაწილის ბ-ქვეპუნქტით, რაც ძალადობის გამოყენებით სამსახურებრივი უფლებამოსილების გადამეტებას გულისხმობს“- განაცხადა სამინისტროში გამართულ ბრიფინგზე შინაგან საქმეთა სამინისტროს ადამიანის უფლებათა დაცვის დეპარტამენტის დირექტორმა ლონდა თოლორაიამ განაცხადა.

თოლორაიას თქმით, შსს მიმართავს საზოგადოებას, არასრულწლოვან მსხვერპლებს, მათ მშობლებს და ყველა იმ პირს, რომლთათვისაც ცნობილი გახდება არასრულწლოვანთა მიმართ განხორციელებული ძალადობის შესახებ, დაუყოვნებლივ აცნობონ პოლიციას, რათა მოხდეს დანაშაულზე დროული რეაგირება და თავიდან იქნეს აცილებული მოძალადეთა მხრიდან ახალი დანაშაულის ჩადენის საფრთხე.