"13 წლის ძმისშვილს საოჯახო დანით სხეულზე 20- მდე დაზიანება მიაყენა"- ბიძის მიერ მოზარდის მკვლელობის საქმე

სამართალი - 14:12, 12 Feb, 2019

9768

რუსთავის საქალაქო სასამართლოში ძმისშვილის მკვლელობაში ბრალდებული ვალერიან ირემაძის სასამართლო პროცესი გაიმართა.

პროცესს სასტიკ მკვლელობაში ბრალდებულიც ესწრებოდა.

ვალერი ირემაძის ადვოკატის ზურა დალაქიშვილის განცხადებით, ამ ეტაპზე ბრალდებულის მდგომარეობა შედარებით დამაკმაყოფილებელია.

უფლებადამცვალის თქმით, დღეს სასამართლო იმსჯელებს აღკვეთი ღონისძიების გამოყენების საკითხზე, ასევე შუამდგმლობაზე ექსპერტიზის ჩატარების თაობაზე და სახელმწიფო სამედიცინო დაწესებულებაში მოთავსებაზე.

„ბრალდებული თავის თავში ჩაკეტილია და იყენებს დუმილის უფლებას", - განაცხადა ადვოკატმა.

პროკურატურა ირემაძის მიმართ აღკვეთის ღონისძიების გამოყენებას მოითხოვს. პროკურორ ლევან ჯალაღონიას განცხადებით, დადგენილია, რომ ბრალდებულმა განსაკუთრებული სისასტიკით, საოჯახო დანის გამოყენებით არასრულწლოვანს სხეულზე 20- მდე დაზიანება მიაყენა.

“პროკურატურის პოზიციაა, რომ ბრალდებულის მიმართ გამოყენებული იყოს პატიმრობა. რაც შეეხება მოსაზრებას, რომ ბრალდებული დანაშაულის ჩადენისას იყო შეურაცხად მდგომარეობაში, ამასთან დაინიშნა სტაციონარულ ფსიქიატრიული ექსპერტიზა, რომელიც განსაზღვრავს მოქმედებდა თუ არა ბრალდებული დანაშაულის ჩადენისას შეურაცხად მდგომარეობაში.

ექსპერტიზის დასკვნა იქნება განმსაზღვრელი მოხდება თუ არა ბრალდებულის სისხლის სამართლის წესით გასამართლება თუ დაენიშნება იძულებითი მკურნალობა", - განაცხადა

რუსთავში 13 წლის მოზარდის მკვლელობისთვის ბიძა რამდენიმე დღის წინ დააკავეს. მეზობლების თქმით, დაკავებულს ფსიქიკური პრობლემები ჰქონდა, თუმცა ის ფსიქიატრიულ საავადმყოფოში ადგილის უქონლობის გამო არ მიიღეს.

ფოტო - "პირველი არხი".