სპეცოპერაციისას დაკავებული ლუკა ჩხეტია და კიდევ 4 პირი გაათავისუფლეს

სამართალი - 16:09, 04 Feb, 2019

2394

თბილისში ჩატარებული სპეცოპერაციისას დაკავებული შვიდი პირიდან, ხუთი პატიმრობიდან გირაოს სანაცვლოდ გათავისუფლდა. გათავისუფლებულთა შორისაა ბატალიონ "დონბასის" მებრძოლი ლუკა ჩხეტია.

დაცვის მხარემ დაკავებულებისთვის 2000 ლარიანი გირაოს სანაცვლოდ გათავისუფლების შუამდგომლობა დააყენა.

აღკვეთის ღონისძიების შეცვლას ეთანხმებოდა ბრალდების მხარეც, შესაბამისად, სასამართლომ დაცვის მხარის შუამდგომლობა დააკმაყოფილა.

რაც შეეხება კიდევ ორ დაკავებულს, კურაგინსა და კლადკოს, მათი საქმე საპროცესო შეთანხმების გასაფორმებლად ძირითად საქმეს ცალკე წარმოებად გამოეყო.

2018 წლის 2 დეკემბერს, ორ სასტუმროში სპეცოპერაციის შედეგად უკრაინის ექვსი და საქართველოს ერთი მოქალაქე დააკავეს.

შსს-ს ცნობით, სასტუმროს ნომრების ჩხრეკისას ამოღებულია ბერეტას და მაკაროვის სისტემის ცეცხლსასროლი პისტოლეტი, ავტომატური ხელნაკეთი ცეცხლსასროლი იარაღი და სხვადასხვა სახის საბრძოლო მასალა.

ფაქტზე გამოძიება დაწყებულია საქართველოს სსკ-ის 236-ე მუხლის მე-3 და მე-6 ნაწილებით, რაც ჯგუფურად ცეცხლსასროლი იარაღის, საბრძოლო მასალის, ფეთქებადი მოწყობილობის მართლსაწინააღმდეგო შეძენა-შენახვას გულისხმობს.

სპეცოპერაციისას დაკავებულებს აღკვეთის ღონისძიებად პატიმრობა 4 დეკემბერს შეეფარდათ.