პირადი ცხოვრების ამსახველი კადრების გავრცელების საქმე - თბილისის საქალაქო სასამართლოში დაკავებული 8 ადამიანისთვის აღკვეთის ღონისძიებაზე მსჯელობა იწყება.

ერთ-ერთი დაკავებულია ზურაბ სოლომნიშვილი, რომელსაც სავარაიდოდ, ფარული ჩანაწერების youtube.com-ზე ატვირთვას ედავებიან.

ადვოკატ მუხრან ღურწკაიას თქმით, ბრალდებული თავს უდანაშაულოდ მიიჩნევს და ამბობს, რომ პირადი ხასიათის კადრები მას არ გაუვრცელებია.

"ვიდეო-მასალას, რომელიც მასთან მოხვდა, მან განაცხადა, რომ ეს ვიდეო მას მესენჯერის საშუალებით გაუგზავნეს.

რაც შეეხება ატვირთვას, მისი მხრიდან youtube-ზე ან სხვა საშუალებაზე ატვირთვა არ ყოფილა. არც მე არ გადმომცემია ის მასალა, რომელზეც არის საუბარი და რომლის ატვირთვასაც ედავებიან. მე როგორც ვიცი, არა მარტო მე, დაცვის არც ერთ მხარეს არ გადასცემია. არადა, ბრალდების მხარეს ჰქონდა ამის ვალდებულება, რომ სრულად გადმოეცა ჩვენთვის ეს მტკიცებულებები. ამ ეტაპისთვის საქმეში არ დევს იმის მტკიცებულება, რომ უშუალოდ მან ატვირთა თავისი „ექაუნთით“ აღნიშნული მასალა,"- განაცხადა მუხრან ღურწკაიამ.