ე.წ. გარდაქმნის თერაპევტი, დევიდ მათესონი, რომელიც წლების განმავლობაში ამტკიცებდა, რომ გეი მამაკაცებს „კურნავდა“ და მათ ჰეტეროსექსუალებად ქცევაში ეხმარებოდა, გამოტყდა რომ გეია.

ის 34 წლის განმავლობაში დაქორწინებული იყო ქალზე.

ამის შესახებ ინფორმაცია ფეისბუკზე, ერთ-ერთ ჯგუფში გავრცელდა, შემდეგ კი თავად მათესონმა დაწერა ფეისბუკზე.

„ერთი წლის წინ მივხვდი, რომ ჩემს ცხოვრებაში ძირეული ცვლილებები მჭირდებოდა. მივხვდი, რომ ქორწინებაში ყოფნა აღარ შემეძლო. და მივხვდი იმასაც, რომ დადგა დრო, როდესაც მეღიარებინა, გეი ვიყავი.

მრავალი წლის განმავლობაში ჩემს ცოლთან ბედნიერი ქორწინება მქონდა. ეს იყო ლამაზი ურთიერთობა, მაგრამ კაცების მიმართ ინტერესსაც განვიცდიდი. ხშირად, ეს ძალიან სუსტი იყო, მაგრამ ზოგჯერ, ძალიან ინტენსიური და ჩემს ქორწინებას ტკივილსა და ტანჯვას აყენებდა.

ცვლილებები რამდენიმე წლის წინ დაიწო. ჩვენი პერსონალური განსხვავებები ძალიან თვალსაჩინო გახდა. ურთიერთობის დინამიკა სტრესული და რთული გახდა“ -წერს დევიდი.

მისი თქმით, განქორწინება ძალიან გაუჭირდა, მაგრამ ეს აუცილებელი იყო, რადგან აღმოაჩინა, საკუთარ თავს „იდეოლოგიურ ტყვებოაში“ ამყოფებდა.

ის ბოდიშს უხდს ყველას, ვისაც მისი „თერაპიით“ ზიანი მიადგა.

„ვიცი, ჩემი საქმიანობა ზოგ კაცს დაეხმარა, ეს თავად მითხრეს. მაგრამ დარწმუნებული ვარ, არის ხალხი, ვისაც ზიანი მივაყენე. ეს ყველაფერი ჩემი ვიწრო გონებიდან და ჰომოფობიიდან მომდინარეობდა. მე ძალიან ვწუხვარ თუკი ამ ყველაფერმა ზიანი მიაყენა ადამიანებს.

დღესაც კი, როდესაც მე გეიდ ვცნობ თავს, ჯერაც ვპოულობ ჰომოფობიას საკუთარ თავში. მაგრამ მე ახლა უფრო მიმღები პიროვნება ვარ, ვიდრე 6 წლის წინ ვიყავი, დავიწყე დიალოგი სხვადასხვა თერაპევტებთან, მათ შორის არიან გეებიც. ჩვენ საათობით ვსაუბრობთ, ვსწავლობთ ერთმანეთს და ვაგვარებთ პრობლემებს ერთად“ - წერს მათესონი.

ე.წ. გეი გარდაქმნის თერაპია ადამიანის სექსუალობის არაჰეტეროსექსუალობიდან ჰეტეროსექსუალობაზე შეცვლის მცდელობა სხვადასხვა მეთოდის და „სამკურნალო საშუალების“ გამოყენებით. ე.წ. გარდაქმნის თერაპიის მთავარ მეთოდს საუბარი წარმოადგენს, თუმცა უფლებადამცველი ორგანიზაციები ირწმუნებიან, რომ რიგ შემთხვევეში ელექტრო შოკებსაც მიმართავენ.

ამერიკის ფსიქიატრთა ასოციაცია და მსოფლიო ჯანდაცვის ორგანიზაცია "გარდაქმნის თერაპიას" არ აღიარებს და მას მავნედ და პოტენციურად მომაკვდინებლად მიმიიჩნევს.