ბრიტანელი ჯეკ შეპარდის საქმეზე თბილისის საქალაქო სასამართლო მსჯელობას დღეიდან იწყებს

სამართალი - 10:10, 25 Jan, 2019

1457

დღეს თბილისის საქალაქო სასამართლო დიდი ბრიტანეთის ძებნილი მოქალაქის, ჯეკ შეპარდის საქმეზე იმსჯელებს. საექსტრადიციო სხდომა 13:00 საათზე გაიმართება. ბრიტანულმა მხარემ საქართველოს სამართალდამცავ სტრუქტურებს შეპარდის გადაცემის შესახებ ოფიციალურად უკვე მიმართა. დღევანდელ სხდომაზე ექსტრადირებამდე მისი აღკვეთის ღონისძიებაზე იმსჯელებენ.

ბრალდებულის ადვოკატები ამის აუცილებლობას ვერ ხედავენ, რადგან მათი განცხადებით ჯეკ შეპარდის მიმალვის საფრთხე არ არსებობს და ის თანამშრომლობს გამოძიებასთან. უფლებადამცველები ასევე მოითხოვენ, არ მოხდეს შეპარდის ბრიტანეთისთვის გადაცემა, რადგან მის სიცოცხლეს ლონდონში საფრთხე ემუქრება.

ბრიტანელი ჯეკ შეპარდი, რომელსაც 24 წლის შარლოტა ბრაუნის არაგანზრახ მკვლელობისთვის 6 წლიანი პატიმრობა დაუსწრებლად აქვს მისჯილი მარტის შემდეგ საქართველოში იმყოფება.

შემთხვევა, რომლის გამოც შეპარდს ბრიტანეთის პოლიცია ეძებდა 2015 წლის დეკემბერში მდინარე ტემზაზე მოხდა. პოლიციის ინფორმაციით ნასვამ მდგომარეობაში მყოფი ჯეკ შეპარდი კატერს გადაჭარბებული სიჩქარით მართავდა, რის გამოც სატრანსპორტო საშუალება გადაბრუნდა და ახალგაზრდა ქალი მდინარე ტემზაში აღმოჩნდა, რის შედეგადაც ის დაიღუპა. შეპარდმა გოგონას დახმარება არ სცადა და შეცდომაში შეიყვანა სამაშველო სამსახურიც.