"ყაზტრანსგაზის“თანამშრომლებს ბრალი სამსახურეობრივი გულგრილობის მუხლით წარედგინათ

სამართალი - 17:41, 19 Jan, 2019

2533

ყაზტრანსგაზის ორ თანამშრომელს ბრალი სისხლის სამართლის კოდექსის 220-ე მუხლის პრიმა ნაწილით წარედგინათ, რაც გულგრილობას გულისხმობს. მათი ადვოკატის განცხადებით, დაკავებულები ბრალს არ აღიარებენ.

ბრიგადა, რომელიც ტრაგედიამდე რამდენიმე საათით ადრე, დიდ დიღომში მდებარე კორპუსში იმყოფებოდა და დასკვნა დადეს, რომ კორპუსში გაზის გაჟონვა არ ხდებოდა, პოლიციამ გუშინ დააკავა. ყაზტრანსგაზის თანამშრომლები კორპუსის მცხოვრებლებმა 16 იანვარს, მას შემდეგ გამოიძახეს, რაც ადგილობრივებმა ბუნებრივი აირის მძაფრი სუნი იგრძნეს, თუმცა, ყაზტრანსგაზის თანამშრომლებმა მათ განუცხადეს, რომ გაყვანილობა წესრიგშია და გაზის გაჟონვა არ ხდება, რამდენიმე საათში კორპუსში დაგროვილი გაზის გამო აფეთქება მოხდა, რამაც 4 ადამიანის, მათ შორის მცირეწლოვანის სიცოცხლე იმსხვერპლა, დაშავდა 8 ადამიანი.

220-ე მუხლის პრიმა ნაწილითგათვალისწინებული სასჯელი ორიდან ხუთ წლამდე თავისუფლების აღკვეთას ითვალისწინებს.

მთლიანობაში დიდ დიღომში კორპუსში მომხდარ აფეთქებაზე გამოძიება სისხლის სამართლის კოდექსის 240-ე და 220-ე მუხლებით მიმდინარეობს, რაც გაზის ობიექტზე უსაფრთხოების წესების დარღვევას და სამსახურებრივ გულგრილობას გულისხმობს.