ზუგდისი მეექვსე საჯარო სკოლის დირექტორის ია კერზაიას შვილმა საგამოძიებო უწყებას ახალი მტკიცებულებები წარუდგინა. ბაჩანა შენგელია პროკურატურისგან ია კერზაიას გარდაცვალების საქმეზე თვეზე მეტია გამოძიების დაწყებას იტხოვენ, თუმცა უშედეგოდ.

„პასუხებს ვიღებთ აბსოლუტურად არაფერს ან რაღაც კომიკური ფორმით ცარიელ ბლანკებს აგზავნიან. ადვოკატთან ერთად ძალიან მოცულობითი დოკუმენტაცია წარვუდგინეთ მტკიცებულებები, მათ შორის, სადაც დეტალურად არის აღწერილი ის დანაშაულის შემადგენლობა, როგორ ხდებოდა ზეწოლა, ზემოქმედება. ეს დამატებით ვიდეო ფაილების სახით, მოწმეების ჩვენებს, თვითონ გარდაცვლილის ვრცელი ინტერვიუ, სადაც ის საუბრობს პოლიტიკურ დევნაზე, ამ ყველაფერს უკვე ვიდეო მტკიცებულებების სახით წარვუდგენთ და დაველოდებით კიდევ რამდენიმე დღე,“ - ამბობს შენგელია.

ია კერზაიას საქმის გამოძიებასთან დაკავშირებით პოლიტიკური ნების არ არსებობაზე საუბრობს ადვოკატი, ლევან მახარაშვილი:

„პროკურატურის თანამშრომლების მხრიდან გამოძიების არდაწყებით ხდება დანაშაულის ჩადენა. მათ არ გააჩნიათ დისკრეცია, დაიწყონ თუ არ დაიწყონ გამოძიება, სისხლის სამართლის საპროცესო კოდექსი ავალდებულებს გამოძიებას, დაიწყოს შესაბამისი მოქმედებები, როგორც კი მიიღებენ ინფორმაციას დანაშაულის შესახებ, ჩვენ მივაწოდეთ არათუ ინფორმაცია დანაშაულის ჩადენის შესახებ, ასევე მივუთითეთ იმ პირების შესახებ, რომლებიც დაადასტურებდნენ კონკრეტულ ფაქტებს, თუმცა მიუხედავად ამისა, არცერთი მათგანი გამოკითხულიც არ გახლავთ დღემდე,“ - განაცხადა ლევან მახარაშვილმა.