თბილისში, ჭავჭავაძის გამზირზე მომხდარ ავარიაში მონაწილე მძღოლის ადვოკატი ამბობს, რომ გუშინ მისი დაცვის ქვეშ მყოფსა და მასთან ერთად მომუშავე სამედიცინო ჯგუფს 27 გამოძახება ჰქონდა.

"არავითარი შესაბამისი ზომები არაა მიღებული იმისთვის, რომ ეს მედპერსონალი უზრნველყოფილი იყოს დასვენებით. ყოველ წუთში გამოძახებებია. ზოგიერთი საინფორმაციო საშუალებით გავრცელდა, რომ მძღოლს ჩაეძინა. ეს არის ფიზიოლოგიური მოვლენა, შეიძლება სულაც არ ჩაძინებოდა და გადაღლილობისგან ადამიანი გაითიშოს... მოძრაობის წესები რომ დარღვეულია, გასაგებია, მაგრამ რა მიზეზით განხორციელდა, არ მგონია გამოძიებას დადგენილი ჰქონდეს. აქ მთელი რიგი ექსპერტიზებია ჩასატარებელი", - განაცხადა ადვოკატმა.

უბედური შემთხვევა თბილისში - გუშინ გამტენიისას სასწრაფო დახმარების ავტომობილი ვაკეში ჯიხურს შეეჯახა, შედეგად 13 ადამიანი დაშავდა, ერთი კი გარდაიცვალა.

სასწრაფო დახმარების ავტომობილის მძღოლს ბრალს დღეს წაუყენებენ.

გამოძიება მომხდარზე 276-ე მუხლით მიმდინარეობს.

უბედური შემთხვევი დროს მძღოლმაც მიიღო დაზიანებები და ის ამ დრომდე კლინიკაში რჩება, მას მრავლობითი დაჟეჟილობა და თვინის შერყევა აღენიშნება.