ქართული რქაწითელი შესაძლოა პირველი ღვინო გახდეს, რომლის დალევაც მარსზე იქნება შესაძლებელი, ამის შესახებ საუბარია Washington Post -ის სტატიაში სათაურით "თეთრი ღვინო წითელ პლანეტაზე". სტატიაში ნათქვამია, რომ ქართველი მკვლევარები აქტიურად არიან ჩართული პროექტში, რომლის მიზანიც იმის დადგენაა, თუ რომელი ყურძნის მოშენება იქნება შესაძლებელი წითელ პლანეტაზე. გამოცემის ცნობით, წელს პროექტის მონაწილეები აპირებენ, თბილისის ერთ-ერთ სასტუმროში პირველი ე.წ. ვერტიკალური ბაღი გახსნან.

ავტორი წერს, რომ მას შემდეგ, რაც ილონ მასკმა 2024 წლისთვის მარსზე ადამიანის მონაწილეობით პირველი ექსპედიციის გაგზავნა დაანონსა, საქართველოში მეცნიერები და აკადემიკოსები ყურძნის ისეთი ჯიშის შერჩევას შეუდგნენ, რომელიც წითელ პლანეტაზე არსებულ პირობებს გაუძლებს. მეცნიერები მიიჩნევენ, რომ წითელი პლანეტის კლიმატს არა შავი, არამედ თეთრი ფერის ყურძენი უფრო გაუძლებს. მარსზე მოშენების ერთ-ერთი კანდიდატად რქაწითელი განიხილება. მკვლევარების აზრით, რქაწითელის კანი მარსის მტვრის ქარიშხლებს ადვილად გაუძლებს. ავტორი იხსენებს, რომ მსგავსი პროექტი წარმატებით განხორციელდა პერუში, სადაც მარსზე არსებული გარემოს მსგავს პირობებში კარტოფილი მოიყვანეს.