„ალბატროსის“ წარმომადგენლებმა მოსამართლეს ყალბი დოკუმენტაცია წარუდგინეს“

„ალბატროსის“ წარმომადგენლებმა მოსამართლეს ყალბი დოკუმენტაცია წარუდგინეს“ - სკანდალური პროცესის სკანდალური დეტალები

სამართალი - 12:36, 26 Dec, 2018

7734

21 დეკემბერს, თბილისის საქალაქო სასამართლოში კომპანია "ალბატროსის" ყოფილი თანამშრომლებისა და ორგანიზაციის ამჟამინდელი მენეჯმენტის სასამართლო პროცესი გაიმართა.

საქმე ეხება კომპანიის ოცამდე თანამშრომლის სარჩელს, რომლის თანახმადაც, ისინი უკანონო გათავისუფლებასა და კუთვნილ ხელფასებზე დავობენ.

სასამართლო პროცესს ესწრებოდა კომპანიის რამდენიმე ყოფილი თანამშრომელი და „ალბატროსის“ წარმომადგენლები - ცოტნე ჩიქვინაძე და სალომე ხორავა.

როგორც „ნიუპოსტს“ კომპანიის ყოფილმა თანამშრომელმა, სალომე სარიშვილმა განუცხადა, მხარეებმა სასამართლოს სრულყოფილი დოკუმენტაცია ვერ წარუდგინეს, რის გამოც სხდომა 16 იანვრამდე გადაიდო.

სარიშვილის განცხადებით, ერთ შემთხვევაში „ალბატროსის“ იურისტმა ვერ დაასაბუთა, თუ რატომ გაათავისუფლეს რამდენიმე თანამშრომელი სამსახურიდან, როცა მათ შრომით ხელშეკრულებებს ვადა გასული არ ჰქონდა.

„მოსამართლემ საქმის არსში უკეთ გარკვევისთვის ორივე მხარეს სრულყოფილი დოკუმენტაციის წარდგენა დაგვავალა, თუმცა აქვე ხაზგასმით მინდა აღვნიშნო თავად „ალბატროსის“ წარმომადგენლების პოზიცია, რომელთაც რატომღაც საკუთარი თავი დააჯერეს, რომ ჩვენი სამსახურიდან გათავისუფლება ლეგიტიმური იყო და შესაბამისად, მოსამართლესაც ყალბი დოკუმეტცია წარუდგინეს. უფრო მეტიც, მათ მოსამართლის კომპეტენციასა და ცოდნაში ეჭვი შეიტანეს, რაც ჩვენ დაუშვებლად მიგვაჩნია. ჩვენ ღრმად გვჯერა მოსამართლის პროფესიონალიზმისა და სამართლიანი გადაწყვეტილების, ამიტომ მოუთმენლად ველით 16 იანვარს, ვინაიდან მიგვაჩნია, რომ სასამართლო არის ერთადერთი გზა, რისი მეშვეობითაც ჩვენი სიმართლის დამტკიცებას შევძლებთ და იმედია ეს ასეც იქნება,"- აცხადებს სარიშვილი.