„სამხარაულის ბიურომ სიმართლის თქმა ვერ გაბედა“ - მაჩალიკაშვილების ადვოკატი თემირლანის მკვლელობის კომპლექსურ ექსპერტიზაზე

სამართალი - 12:30, 26 Dec, 2018

1767

ლევან სამხარაულის სახელობის ექსპერტიზის ეროვნულმა ბიურომ თემირლან მაჩალიკაშვილის საქმეზე კომპლექსური ექსპერტიზა დაასრულა. 19 წლის მოკლული ბიჭის ოჯახის უფლებადამცველი ამბობს, რომ დასკვნის მიხედვით, ვერ დგინდება, რა მდგომარეობაში იყო მაჩალიკაშვილი სროლის მომენტში, შესაბამისად, მთავარი კითხვა კვლავ პასუხგაუცემელია.

ოჯახის მიერ ჩატარებული დამოუკიდებელი ექსპერტის შედეგად კი დადგინდა, რომ სროლისას თემირლან მაჩალიკაშვილს თავი ბალიშზე ედო.

მარიამ კუბლაშვილის თქმით, სამხარაულის ექსპერტიზამ ვერ გაბედა დასკვნაში სიმართლე ჩაეწერათ.

„რა მოლოდინიც და ეჭვიც მქონდა, მაღალი ალბათობით, ის გამართლდა. ვერ გაბედა სამხარაულის ექსპერტიზის ეროვნულმა ბიურომ თქვას სიმართლე, რადგან ეს არის უმნიშვნელოვანესი მტკიცებულება, დაადგინოს გარემოება, რომ თემირლანს თავი არ ჰქონდა წამოწეული - ეს ვერ გაბედა. განსხვავებული პოზიცია რომ არსებობს ჩვენს მიერ მოწვეულ ექსპერტებსა და სამხარაულის ექსპერტებს შორის, ეს უკვე იმის ნიშანია, რომ მათ ვერ გაბედეს სიმართლის დაწერა"- განაცხადა მაჩალიკაშვილის ადვოკატმა.