მანჰეტენის ფედერალურმა სასამართლომ ე.წ „კანონიერ ქურდს“ 41 წლის რაჟდენ შულაიას, იგივე რაჟდენ პიტერსკის 45 წლიანი პატიმრობა მიუსაჯა.

ნიუ-იორკის სამხრეთ ოლქის პროკურატურამ შულაიას ბრალი დასდო, როგორც „აღმოსავლეთევროპული დანაშაულებრივი დაჯგუფების მთავარ ბოსს, როგორც ნიუიორკში ასევე აშშ-ის მთელ აღმოსავლეთ სანაპიროზე.“ ბრალდების მხარე შულაიასთვის თავისუფლების 65 წლით აღკვეთას ითხოვდა.

სასამართლო ზედამხედველობის განყოფილება, რომელიც მოსამართლეებს სასჯელთან დაკავშირებით რეკომენდაციებს აძლევს, მოსამართლეს სამუდამო პატიმრობის გამოყენებას ურჩევდა.

მოსამართლე ლორეტა პრესკა რეკომენდაციებს ეთანხმებოდა, რადგან შენიშნა, რომ განაჩენის გამოტანის დროს შულაიას არ ეტყობოდა, რომ სინანულს განიცდიდა და ნაკლებ სავარაუდო იყო, პატიმრობის დროს გამოსწორებულიყო. ამიტომ მოსამართლემ ჩათვალა რომ მისი საზოგადოებიდან განრიდების ერთადერთი გზა, მისი გისოსებს მიღმა რაც შეიძლება დიდხანს გაჩერება იქნებოდა. მიუხედავად ამისა, მოსამართლე 45 წლიანი სასჯელით შემოიფარგლა, საიდანაც 15% გამოიქვითება თუ შულაია სამაგალითო ქცევის მინიმუმს მაინც დააკმაყოფილებს. რაჟდენ შულაიას თავისუფლებაზე გამოსვლა მინიმუმ 70 წლის ასაკში მოუწევს, სასჯელის მოხდის შემდეგ ის რუსეთში იქნება დეპორტირებული, რომელიც მან 2010 წელს დატოვა,

ნიუ-იორკის შტატის სასამართლომ რაჟდენ შულაია დანაშაულებრივი ჯგუფის შექმნის, რეკეტის, ნარკოტიკებით ვაჭრობის, ასევე თამაშების არაკანონიერი ორგანიზებისა და ძარცვის ბრალდებით დამნაშავედ ივნისში ცნო.