ზვიად რატიანის საქმე - პოეტი პროკურატურას მიმართავს და პოლიციელების დასჯას ითხოვს

სამართალი - 10:27, 13 Dec, 2018

1561

პოეტი ზვიად რატიანი რომელიც სამართალდამცველებს ფიზიკურ შეურაცხყოფაში ადანაშაულებს, ინციდენტიდან ერთი წლის თავზე პროკურატურას მიმართავს და პოლიციელების მიმართ გამოძიება დაიწყონ.

რატიანის ადვოკატების თქმით, იმ შემთხვევაში თუ ქართული საგამოძიებო უწყებები რეაგირებას არ მოახდენენ, ისინი სტრასბურგის სასამართლოს მიმართავენ.

„მიგვაჩნია, რომ საქმეში არსებობს უკვე საკმარისი მტკიცებულებები იმისთვის, რომ გამოძიება აღარ გაიწელოს უსასრულოდ და მიიღოს საგამოძიებო ორგანომ შემაჯამებელი გადაწყვეტილება. საქმეში გამოკვეთილია რამდენიმე პოლიციელი. სწორედ ამ ადამიანების პასუხისმგებლობის საკითხი უნდა დადგეს. რაც შეეხება თუ რატომ არ იღებს გადაწყვეტილებას საგამოძიებო ორგანო, ვფიქრობთ რომ თავს იკავებენ პოლიციელების პასუხისგებაში მიცემისაგან,“- განაცხადა ადამიანის უფლებების სწავლებისა და მონიტორინგის ცენტრის იურისტმა ანა ნასრაშვილმა.

პოეტის მტკიცებით, სამართალდამცველებმა 2017 წლის 23 დეკემბერს ქუჩაში ის ქურთუკის ფერის გამო გააჩერეს და ფიზიკური შეურაცხყოფა მიაყენეს. სასამართლომ კი რატიანი ხულიგნობისა და პოლიციის დაუმორჩილებლობის გამო დააჯარიმა.