საახალწლოდ ბევრი შოკოლადის მოხმარება უჩვეულო საქმე არ არის, მაგრამ გერმანიის ერთ-ერთ პატარა ქალაქში ძალიან ტკბილი ინციდენტი მოხდა.

ქალაქში, რომელიც დორტმუნდიდან 25 მილის მოშორებით მდებარეობს, ერთ-ერთ შოკოლადის ქარხანაში შოკოლადის შემნახავი ავზი მწყობრიდან გამოვიდა. აღნიშნულის გამო შემთხვევის ადგილზე სახანძრო ბრიგადები გამოიძახეს, რომლებსაც ტკბილი სანახაობა დახვდათ. ასფალტზე ტონობით შოკოლადი იყო დაღვრილი.

აღსანიშნავია, რომ შოკოლადმა ქარხნის ტერიტორიიდანაც გამოჟონა და მიმდებარედ, სამანქანო გზაზეც დაიღვარა.

სამანქანო გზა ტკბილი ინციდენტის გამო ორი საათის განმავლობაში გადაკეტილი იყო. ქარხნის დირექტორის განცხადებით, ინციდენტი აღმოფხვრილია და ქარხანა დღეიდან მუშაობას განაგრძობს. ინციდენტი ორშაბათს მოხდა.