ხორავას ქუჩაზე მოზარდების მკვლელობა - თბილისის საქალაქო სასამართლოში ხორავას ქუჩის მკვლელობის საქმეზე მიცემული ცრუ ჩვენებისთვის დაკავებული არასრულწლოვნის პროცესი გრძელდება.

პროცესზე დაიკითხებიან მოწმეები, რომელთა ვინაობასაც ბრალდება არ ასაჯაროებს. პროკურორის განცხადებით, სასამართლო პროცესზე გამოცხადებულები არიან არასრულწლოვანი და სრულწლოვანი მოწმეები, რომლებიც აღნიშნულ სისხლის სამართლის საქმესთან პირდაპირ კავშირში არიან.

ბრალდებული დ.ღ.-ს ადვოკატი მისი დაცვის ქვეშ მყოფისთვის აღკვეთის ღონისძიების სახის შეცვლას ითხოვდა, მაგრამ მოსამართლემ ადვოკატის შუამდგომლობა არ გაიზიარა და დ.ღ. კვლავ პატიმრობაში დატოვა.

„მოსამართლემ კანონის მოთხოვნა დაარღვია, როგორც არასრულწლოვანთა მართლმსაჯულების კოდექსი, ასევე ბავშვთა კონვენცია. მოსამართლე კვლავ იქცევა და იმყოფება პროკურატურის ზეწოლის ქვეშ. ეს ბავშვი პროკურატურას მძევლად ჰყავს. იმ მარტოა საკანში სამ თვეზე მეტია. ვერც ერთი მოწმე ვერ ადასტურებს მის მიმართ წარდგენილ ბრალს. ვერავინ საუბრობს ფაქტებზე, 30-ზე მეტი მოწმე დავკითხეთ“, – განაცხადა ადვოკატმა ფრიდონ სუხიაშვილმა.