ბათუმის საქალაქო სასამართლოს მოსამართლის გადაწყვეტილებით, ქედაში ქვის კარიერზე აფეთქების შედეგად 6 წლის ბავშვის დაღუპვის საქმეზე დაკავებულ თურქეთის სამ მოქალაქეს აღკვეთის ღონისძიების სახით პატიმრობა შეეფარდა.

მოსამართლის თქმით, დაკავებულების გათავისუფლების შემთხვევაში მტკიცებულებათა განადგურებისა და მიმალვის საფრთხე არსებობს.

როგორც დაკავებულების ადვოკატმა ვაჟა ხახუტაიშვილმა ჟურნალისტებს განუცხადა, სასამართლოს გადაწყვეტილებას გაასაჩივრებენ.

წინასასამართლო სხდომა 25 დეკემბერს ჩაინიშნა.

შეგახსენებთ, რომ 31 ოქტომბერს, ქედაში, სოფელ დოლოგანში ქვის კარიერზე მომხდარი აფეთქების შედეგად 6 წლის ბავშვი დაიღუპა.