თბილისის საქალაქო სასამართლოში თბილისში, ხორავას ქუჩაზე მკვლელობის საქმეზე მოწმეზე ზემოქმედების ბრალდებით დაკავებული მერაბ მორჩაძის საქმეზე დღეს მორიგი სასამართლო სხდომა გაიმართა, რომელზეც ლუკა კალანდია დაიკითხა.

ლუკა კალანდია ხორავას ქუჩაზე მომხდარი მკვლელობის საქმის მთავარი მოწმის მიხეილ კალანდიას ძმა და მორჩაძის საქმეზე ერთ-ერთი მთავარი მოწმეა.

გამოძიების ინფორმაციით, მერაბ მორჩაძე კალანდიების ოჯახის ახლობელია და მ.კ-ს, თანხის სანაცვლოდ, ჩვენების შეცვლა სთხოვა და მასზე ზეწოლაც მოახდინა. ბრალდებული წარდგენილ ბრალს არ აღიარებს, თუმცა კალანდიების ოჯახთან კავშირს არ უარყოფს.

ლუკა კალანდიას მედიასთან კომენტარია რ გაუკეთებია, თუმცა მისი ადვოკატი ადასტურებს, რომ მერაბ მორჩაძემ კალანდიას თანხა ნამდვილად გადასცა. უფლებადამცველის შეფასებით, თანხის გადაცემა მოწმეზე ზემოქმედებას არ უკავშირდება და მორჩაძემ მას მხოლოდ ფინანსური დახმარება გაუწია.

„მისი ჩვენებით, ფაქტიურად დადასტურდა ერთის მხრივ ის ფაქტი, რომ გარკვეული სახის თანხა დახმარების მიზნით გადაცემული არის ოჯახზე, თუმცა აქ არის მთავარი და მნიშვნელოვანი გარემოება, რომ ბრალდების მიერ გამოკითხული ერთ-ერთი მთავარი მოწმის მიერ მიცემული ჩვენებით, დადასტურებულია, რომ ეს არ იყო ვინმეს მოსყიდვის ფაქტი, ეს არის ის შემთხვევა, როდესაც ადამიანები, ნათესავები ერთმანეთს ეხმარებიან და სწორედ ამ მიზნით იქნა თანხა გადაცემული.“ - განაცხადა ადვოკატმა, გაგი მოსიაშვილმა.

გუშინ აღნიშნულ საქმეზე მიხეილ კალანდიაც დაიკითხა, იმის გამო. რომ პროცესი დახურული იყო, კალანდიას ჩვენების დეტალები არ გასაჯაროებულა.