იაგო ხვიჩიას შემდეგ, პოლიციაში ვახტანგ მეგრელიშვილიც გადაიყვანეს

სამართალი - 14:09, 20 Oct, 2018

2651

„გირჩის" თავმჯდომარის, იაგო ხვიჩიას, დაკავების შემდეგ, კრიმინალური პოლიციის თანამშრომლებმა განყოფილებაში პარტიის ლიდერი ვახტანგ მეგრელიშვილიც გადაიყვანეს. ხვიჩია და მეგრელიშვილი თაბუკაშვილის ქუჩაზე მდებარე პოლიციის განყოფილებაში არიან გადაყვანილნი .

შეგახსენებთ, დღეს, 20 ოქტომბერს, 4:20 საათზე დედაენის ბაღში "გირჩის" მიერ ორგანიზებული "კანაფის ლეგალიზაციის ფესტივალი" გაიმართება. როგორც პარტიის წარმომადგენლები აცხადებენ, აქციის მიზანია, საზოგადოება და ასევე საქართველოში ჩამოსული ტურისტები გაერთონ.

აღნიშნულ ფესტივალს გამოეხმაურა შსს-ც , უწყების თქმით იმ შემთხვევაში, თუ ე.წ. ფესტივალზე ვინმეს (მათ შორის პოლიტიკური გაერთიანების წევრების თუ საპრეზიდენტო კანდიდატის) მხრიდან ადგილი ექნება რაიმე ტიპის სამართალდარღვევას - ნარკოტიკული საშუალების გასაღებას, ფლობას, მოხმარებას თუ პოპულარიზაციას, პოლიცია სამართალდამრღვევი ყველა პირის მიმართ გაატარებს საქართველოს კანონმდებლობით გათვალისწინებულ ზომებს.

„მოვუწოდებთ მოქალაქეებს, მათ შორის პოლიტიკური გაერთიანება “გირჩის” წარმომადგენლებს, შეწყვიტონ სამართალდარღვევებისკენ მოწოდება, თავი შეიკავონ პროვოკაციული განცხადებებისგან და სამართალდარღვევების ჩადენისგან. წინააღმდეგ შემთხვევაში, პოლიცია გამოიყენებს კანონით განსაზღვრულ მის ხელთ არსებულ ყველა ბერკეტს სამართალდარღვევების აღსაკვეთად" - აღნიშნულია შსს-ს განცხადებაში.