თაროდან ჩამოღებული ბადრი პატარკაციშვილის საქმე - პროკურატურამ 4 ყოფილი მაღალჩინოსანი პასუხისგებაში მისცა

სამართალი - 20:05, 16 Oct, 2018

5722

საქართველოს მთავარმა პროკურატურამ , ბადრი პატარკაციშვილის მკვლელობის მომზადების ფაქტზე 4 ყოფილი მაღალჩინოსანი პასუხისგებაში მისცა.

არსებული ინფორმაციით, ბრალი კუდის ყოფილ მაღალჩინოსნებს წაუყენეს. მედიაში გასული ინფორმაციის თანახმად, საგამოძიებო უწყებამ მტკიცებულებაზე ჯერ კიდევ 2016 წელს ჩაატარა ექსპერტიზა, თუმცა რეზონანსული საქმე მხოლოდ რუსთავი 2 - ის მიერ გავრცელებული სკანდალური ფარული ჩანაწერების შემდეგ გაახსენდა.

როგორც ირკვევა, საქმეში მთავარი მტკიცებულება 2007 წელს გაკეთებული ჩანაწერია, რომლის ავთენტურობას ადვოკატები სადავოს ხდიან.

ბრალდებულ რევაზ შიუკაშვილის ადვოკატის ქეთი მირიანაშვილის განცხადებით, ხმაურიან საქმეზე ბრალის წარდგენა პროკურატურას ბოლო დროის სკანდალებიდან საზოგადოების ყურადღების გადასატანად დასჭირდა.

„ჩემი დაცვის ქვეშ მყოფი თავს უდანაშაულოდ გრძნობს და თვლის, აღნიშნული ბრალი დაფუძნებულია ე.წ. მტკიცებულებებზე, რომელიც 2007-2008 წლებში არის, ვითომდა, ჩაწერილი. აქ არის გარკვეულ ჩანაწერებზე საუბარი, რომლის ავთენტურობაც დიდი ეჭვის ქვეშ დგას. აღნიშნულთან დაკავშირებით გაკეთებულია ექსპერტიზებიც სამხარაულის ეროვნულ ბიუროში 2016 წელს და რატომღაც აღნიშნული საქმე ამდენი წლის განმავლობაში პროკურატურაში თაროზე შემოდებული იყო. დღესდღეობით, როდესაც გაუჭირდა ხელისუფლებას, ან პროკურატურას, არის ე.წ. შემოგდებული საქმე გარკვეული თემების გადასაფარად. დავუშვათ, რომ აღნიშნული ჩანაწერები არის ავთენტური, ამ შემთხვევაშიც ჩანაწერებში არ იკვეთება დანაშაულის გარკვეული ნიშნები, ვინაიდან ყველა იურისტმა იცის, რომ მომზადებას უნდა მოჰყვებოდეს გარკვეული ქმედებები,“ - განაცხადა ადვოკატმა, ქეთი მირიანაშვილმა.

"ნიუპოსტი" დეტალებს პროკურატურაში არკვევს.